DILI, STLTIMORLESTE.com – Prezidente Organizasaun Rezistensia Hametin FRETILIN (ORHF), Abilio Mesquita Dallas hasoru malu ho Sekretariu Jeral Partidu FRETILIN, Mari Alkatiri hodi komprimenta, tanba komunidade Musulmanu selebra loron idul Fitri, aleinde nee oinsa hametin konsolidasaun partidu iha futuru.
Bainhira remata hasoru malu, Prezidente Organizasaun ORHF, Abilio Mesquita Dallas ba jornalista sira iha Farol, Tersa nee (01/04/2025) hatete, hanesan ema Timoroan iha kultura mai hasoru malu hodi komprimenta Sekretariu Jeral Partidu FRETILIN, tanba loron ohin loron espesial ba komunidade Musulmanu iha mundu inklui mos Timor Leste.
“Hanesan ema Timor iha kultura moral, entaun loron boot ba ita nia maluk komunidade Musulmanu sira liu-liu ita nia kamarada Mari hanesan ema Timor iha kultura no moral, hau mai vizita nia fo boas festa ba nia, tanba loron ohin loron Musulmanu nia Idul Fitri,” dehan Abilio.
Nia hatete, iha loron espesial Komunidade Musulmanu no sarani katolika mos atu tama ona paskoa oras nee tama kuarezma no hela semana rua, loron neebe ema presiza perdua malu, tanba nee nia mai komprimenta SekJer FRETILIN.
“Hanesan senior ida, hanesan junior no hanesan oan ba aman nee normal, hanesan ita boot sira hatene katak hau la koalia buat ida, hanesan FRETILIN hau mai hau nia uma nee hanesan baibain ida,” katak Mausoko.
Nia hatete, iha hasoru malu nee koalia mos asuntu seluk komiku oituan ho buat neebe mak liu ona, maibe loron ohin loron neebe ema simu malu perdua malu, tanba nee sira rua hasoru malu hodi konta istoria hanesan ema ba ema.
Iha hasoru malu nee, Sekretariu Jeral Partidu FRETILIN, Mari Alkatiri husu Abilio Mausoko oinsa mak hametin nafatin konsolidasaun entre ema ba ema liu-liu partidu ninia lideransa sira, ida nee mak presiza.
Tuir observasaun neebe STL hetan, Prezidente ORHF, Abilio Mesquita Dallas akompanha mos Sekretariu Jeral, Joaquim Fernandes mak hasoru malu ho Sekretariu Jeral Partidu FRETILIN, Mari Alkatiri, iha rezidensia Farol.
(eme)
