DILI, STLTIMORLESTE.com – Prezidente Republika (PR) Jose Ramos Horta apresia komunidade uma lisan Aidil Heil Neurtura neebe oferese rai eransa neebe bei-ala sira husik hela hamutuk hektares 4 ba Sentru Santa Bakhita School, hodi harii eskola hahu husi Pre-Eskolar too nível Universtariu, iha Suku Letefoho, Postu Administrativu Same, Munisípiu Manufahi.
Tuir komunikadu neebe STL asesu husi media PR Segunda nee (21/10/2024) hatete, Prezidente Republika konsidera, komunidade neebe oferese rai, hatudu sira nia matenek tanba oferese rai atu prepara kiik-oan sira-nia futuru hodi kontinua rai nee ba oin.
Komunidade Santa Bakhita ho sira-nia parseiru sira sei harii eskola ida neebe nia sertifikadu sei rekonhese mos husi Governu Austrália nian, no sei halo ajustamentu husi kurríkulu Austrália nian ba kurríkulu nasional.
Tuir planu projetu harii eskola nee sei remata iha tinan 3 ba oin konforme apoiu sira neebe oferese husi doadór sira.
Aleinde nee, Prezidente Republika halo mos abertura ba konsertu karitativa (Fundraising Concert) iha estadiu munisipál manufahi ho objetivu atu tulun grupu voluntariu neebe lidera husi jovem Australiana, Ornela hodi harii eskola St. Bakhita iha Manufahi.
(eme)
