DILI, STLTIMORLESTE.com – Esperansa boot ho vizita Prezidente Republika (PR), Jose Ramos Horta ba Vatikanu iha fulan Novembru hasoru malu ho Papa Leao, bele konvida Papa Vizita Timor Leste (TL).
Madre Asti Soares husi Kongregasaun Alma kontente rona informasaun katak Prezidente Republika sei hasoru malu ho sua Santidade Papa Leao iha fulan Novembru, espera katak ho vizita nee bele konvida Papa vizita tan Timor Leste.
“Esperansa boot tebes karik ho ita nia Prezidente Republika nia prezensa iha Santa Se neebe sei hasoru direita ho Papa Foun Leao XIV, espera katak ho Prezensa Prezidente Republika nian Amu Papa Leao nia laran mos loron ida bele vizita rai doben Timor- Leste,” dehan Madre Asti ba STL, iha nia knaar fatin Pantai Kelapa, Dili, Kuarta (10/09/2025).
Madre nee mos fiar ho Prezidente Republika nia vizita ba Santa Se Roma, bele konvida Sua Santidade Papa Leao XIV bele vizita dala ida tan povu no sarani Timor Leste.
“Esperansa mak ita nafatin moris iha unidade pas no hakmatek, liu liu ohin selebra vizita Sua Santidade Papa Francisco mai Timor- Leste ba tinan 1, laos selebra deit nia memoria mai iha nee maibe ita ho esperansa boot katak, ita selebra hodi hanoin hikas fali nia lia menon ou mensajen furak sira neebe husik hela ba it,a nunee ita nuudar sarani nuudar povu diak ba nasaun ida nee ita aplika buat diak neebe amo Papa Francisco husik hela ba ita, iha nia viajen mai Timor -Leste liu liu husi mensajen sira,” dehan Madre Asti.
Nunee mos Madre Superiora husi Kongregasaun ALMA, Madre Florensia Nebo Hokeng afirma, ho vizita Prezidente Republika nia ba i ha Vatikanu iha fulan Novembru sei hasoru malu ho Papa Leao XIV espera katak, ho vizita nee bele konvida Papa Leoa Vizita dala tan Timor Leste, karik mai Timor Leste keta haluha vizita mos Orfonatu Alma.
“Esperansa ho vizita Prezidente Republika ba iha Vatikanu bele konvida mos Papa Leao XIV bele mai Timor Leste, karik mai Timor Leste keta haluha vizita mos ami iha fatin ida nee, ami la husu espesial hasoru labarik sira neebe ho nesesidade espesial iha fatin ida nee, maibe karik iha tempu bele hakat mai vizita mos iha fatin ida nee ami nia esperansa boot,” dehan Madre Superiora nee.
Entretantu foin lalais nee Prezidente Republika, Jose Ramos Horta hatete, nia iha ona ajendamentu hasoru malu ho Papa Leao XIV iha fulan Novembru nia laran, no espera katak ho vizita Prezidente Republika nia ba Vatikanu iha fulan Novembru bele konvida Papa Leao vizita Timor Leste.
Jornalista: Emerenciana Pinto / Mikael Mali Mau
Editora: Carme Ximenes
