DILI, STLTIMORLESTE.com – Prezidente Republika (PR), Jose Ramos Horta husu ba povu no sarani atu kria pas, iha tempu ka loron natal no tinan foun 2026.
Prezidente Republika Jose Ramos Horta hatoo kestaun nee liu husi mensajen bainhira remata konvoka reuniuan Konselhu Estadu no Konselhu Superior Defeza no Seguransa, iha Palasiu Prezidensial, Nicolau Lobato, Bairo Pite, Segunda (22/12/2025) hatete, tempu matal laos tempu uniku, maibe tempu neebe espesial tanba nee husu ema hotu nafatin hadomi malu.
“Ba Timoroan sira hotu-hotu iha rai laran, iha liur, iha neebe-neebe imi hela, husi Dili, Palasiu Prezidensial Nicolau Lobato, hau halo mensajen oan ida, ho domin, ho hakuak boot, ho amizade, ho fiar, ho solidaridade ba Timoroan hotu-hotu. Tempu natal laos tempu uniku ba imi, hadomi malu, maibe tempu ida espesial neebe Nai Kristu moris tinan rihun rua resin liu ba. Nai Maromak tau nia oan Jesus Kristu iha mundu, nunee hahu dada dalan ba mundu tomak tuir Nai Kristu nia mensajen neebe mai iha Bíblia. Nunee harii dame, domin iha umanidade tomak,” dehan Prezidente Republika, Horta.
Tanba tuir Xefe Estadu iha rai laran sei iha dezafiu oin oin sei iha mos violensia domestika neebe halo hasoru kiik oan sira, maibe ho loron ksolok nee husu hotu hotu hakribi violensia iha idak idak nia familia, nunee bele moris hakmatek ho dame.
“Iha rai laran ita moris ho dame, moris ho domin barak maibe sei iha dezafiu oi-oin, sei iha violensia domestika, sei iha violensia kontra ksolok oan sira, labarik sira, joven sira. Violensia domestika neebe mai, liu husi aman, mane sira kontra fen, kontra ksolok oan sira, ka violensia luron entre joven sira, krime barak, omesidu barak. Tanba nee mos populasaun elementu neebe iha Bekora, Gleno, Suai barak, tanba violensia oi-oin,” komenta Xefe Estadu.
Ho loron Ksolok Natal nee hanesan Prezidente Republika, Horta husu hotu hotu halo refleksaun ba aan nunee hamete hahalok aat sira liu liu asaun violensia sira, nunee bele moris iha pas nia laran.
“Loron ida nee bele serve ba ita halo promesa ba ita an rasik, nunee hamate tiha violensia iha uma laran, iha aldeia, iha suku, ita hanoin ba ita nia familia, hanoin ba viziñu kiak, faluk, oan kiak sira, nee mak hau nia mensajen. Maibe hanesan povu hatene, hau la hanoin ba kosok oan, kiak, faluk, ferik, katuas sira neebe kiak, tempu natal deit tinan tomak nia laran Prezidensia Republika tau loro-loron atensaun ba kiak sira, ba vulneravel sira, ba ita nia oan, alin sira ho defesiensia, tau matan ba sira nee hetan violensia domestika,” dehan Xefe Estadu.
Horta komenta tempu natal, tempu dame, domin, maibe laos iha 24-25 natal loron festeja lae, natal tenke tinan tinan nia laran ho espiritu domin, dame natal nian, inspira emqa tinan tomak nia laran, nee bele halo Timor Leste sai duni espesial iha mundu neebe laiha violensia domestika.
Laiha abuzu kontra feto ka kontra ksolok oan sira neebe ema hotu haree kriminalidade violensia tun.
Prezidente Republika hatoo mos boas festa Natal no Anu novo ba povu iha Timor laran tomak ho kosok oan Jesus nia moris lori domin no dame ba ema hotu.
Jornalista: Emerenciana Pinto
Editora: Carme Ximenes
