DILI, STLTIMORLESTE.com – Prezidente Republika (PR), Jose Ramos Horta lori vendedora Tia Sofia Hornai dos Santos ba vizita Sua Santidade Papa Leao iha Vatikanu.
Nuudar jestu boot rekunhesimentu nasional nian, Prezidente Republika, Jose Ramos Horta konvida pesoalmente Sofia Hornai dos Santos, inan ida no vendedora servisu nain iha dalan ninin, akompana nia vizita estadu ofisial ba Vatikanu.
Tia Sofia neebe servisu makaas la hatene kole hodi faan modo no dose atu suporta nia oan nain-ualu nia edukasaun iha Dili, hili nuudar konvidadu espesial Prezidente nian ba audiensia ho Sua Santidade Papa Leo XIV.
Nia istoria sakrifísiu no rezilirnsia nian sai nuudar simbolu ba forsa nonook neebe sai nuudar tulan-ruin ba nasaun Timor-oan, no konvite ida nee nuudar testemunha boot ida ba kompromisu Prezidente nian hodi fo onra ba nia eroi loroloron nian.
Ba Tia Sofia, onra ida-nee nuudar mehi ida neebe sai realidade, neebe nia haree hanesan ahi-oan naroman ida ba família hotu neebe luta hasoru difikuldade.
Ho sentimentu gratidaun neebe boot tebes, nia haktuir katak asaun Prezidente nian haruka mensajen forte ida neebe liu fali nia jornada pesoal.
“Hau agradese tebes ba Prezidente Republika, Ramos Horta. Ami nia kondisaun moris sei la sai barreira, maibe motivasaun atu lao ba oin, tanba esperansa nunka bosok,” dehan Tia Sofia liu husi Komunikadu neebe STL, asesu husi media PR, Sesta (21/11/2025).
Nia liafuan sira-nee hanesan lian husi inan aman sira neebe serbisu iha nakukun laran, hodi valida vida tomak nia terus ho silensiu liu husi momentu ida fo dignidade boot nian.
Desizaun Prezidente Republika, Ramos Horta nian nuudar artikulasaun klaru ida husi nia vizaun ba nasaun vizaun ida neebe haree no fo valor ba kontribuisaun sidadaun hotu-hotu nian. Hodi hasae inan ida neebe haraik aan ba palku mundial, Prezidensia afirma katak forsa loloos Timor-Leste nian hela iha espíritu metin povu nian.
Asaun ida nee defende dignidade servisu nian no hametin liutan konesaun klean administrasaun nian ho povu kik, hodi hatudu katak lideransa loloos mak rekonhese valor boot tebes iha moris loroloron sira nian neebe hamutuk harii futuru nasaun nian.
Jornalista: Emerenciana Pinto
Editora: Carme Ximenes
