DILI, STLTIMORLESTE.com – Prezidente Senadu no eis Primeiru Ministru Reinu Kambodia, Hun Sen ho delegasaun hamutuk 43 too ona iha Aeroportu Internasional Prezidente Nicolau Lobato, Komoro, Dili.
Tuir observasaun STL Kuarta (07/05/2025) lokraik nee, membru delegasaun neebe akompanha Senadu Reinu Kambodia nee inklui mos Visi Prezidente Senadu Kambodia OuCH Borith, Prezidente Komisaun Negosiu Estranjeiru Kooperasaun Internasional no Informasaun Senadu Kambodia CHEM Widhya, Prezidente Komisaun Negosiu Estranjeiru, Kooperasaun Internasional no Informasaun Asembleia Nasional SOUS Yara, Ministru Senior enkaregafu ba Enkargu ba Misaun Espesial SRY Thamarong, Sekretariu Jeral Senadu Kambodia LAY Samkol, Xefe Gabinete Prezidente Senadu Samdech CHHIV Yiseang, Sekretariu Estadu Komersiu PICH Rithi, Deputadu no Asistensia ba S.E. OTSMAN Hassan ROFY Othsman, Sekretaria Estadu, Gabinete Konsellu Ministru (KOM) KET Sofan, Sekretaria Estadu (KOM), no Protokolu ba Prezidente Senadu Samdech PURY Sokha, Sekretariu Estadu tutela ba Ministeriu Finansas no Ekonomia SIM Vireak, inklui delegasaun sira seluk husi Ministériu Negósiu Estranjeiru Reinu Kambodia no média sira Reinu Kambodia nian.
Prezidente Senadu Reinu Kambodia ho delegasaun too iha Aeroportu Internasional simu direta husi Prezidente Republika (PR) José Ramos Horta, Primeiru Ministru (PM) Kay Rala Xanana Gusmão, Visi Primeiru Ministru no Ministru Koordenador Asuntus Ekonomikus Ministru Turizmu no Ambiente, Francisco Kalbuadi Lay no membru governu sira.
Entretantu Durante vizita Timor Leste Prezidente Senadu no eis Primeiru Ministru Reinu Kambodia nee sei iha enkontru ho Prezidente Parlamentu Nasionál Timor Leste, Maria Fernanda Lay no sei iha mos sesaun solene iha neebe Senadu Reinu Kambodia sei hatoo mos nia diskursu liga ho polítika relasaun bilateral nasaun rua nian, kontinua ba sorumutu ho Primeiru Ministru Kay Rala Xanana Gusmão no membru governu sira iha Palasiu Governu no kontinua mos iha enkontru bilateral ho Prezidente Republika José Ramos Horta iha Palasiu Prezidensial Nicolao Lobato Bairo Pite.
Senadu Reinu Kambodia Hun Sen sei hatoo mos nia diskursu ofisial iha Palásiu Prezidensial neebe sei haktuir kona-ba Jenosidiu no kiak too liberdade no prosperidade.
Tuir ajenda iha loron 08 fulan Maiu Senadu Reinu Kambodia Hun Sen sei vizita mos Portu Baia Tibar no sei akompanha husi Ministeriu relevante no parte loraik sei iha bangkete neebe oferese husi Prezidente Repúblika José Ramos Horta iha Palasiu Nobre Lahane.
(alb)
