DILI, STLTIMORLESTE.com – Primeiru Ministru (PM), Kay Rala Xanana Gusmão halao enkontru ho Enkaregadu Negosiu Estranjeiru Estadus Unidus Amerika (EUA) iha Timor Leste (TL), Bruce Begnell, hodi koalia ka diskute kona-ba Adezaun TL ba Association of Southeast Asian Nations (ASEAN).
Enkontru neebe halao durante minutu 30 resin nakonu ho amizade no Enkaregadu nee mos sublina kona-ba oinsa EUA nia apoiu ba TL, iha faze preparasaun no depois de adezaun ba Assosiasaun Suzeste Aziatiku nee.
“Ohin ami mai halo audiensia ho Primeiru Ministru, ami koalia liu kona-ba adezaun Timor Leste nian ba ASEAN,” informa Bruce Begnell ba jornalista sira iha Palasiu Governu, Sesta (22/08/2025).
Aleinde nee Bruce Begnell ho Primeiru Ministru Xanana koalia mos kona-ba kooperasaun EUA ho Timor Leste iha area maritima no seguransa.
Ezemplu konkreta ida neebe parte rua koalia mak kona-ba apoiu, iha area seguransa liu husi esforsu EUA nian hodi halo hela reabilitasaun ba Aeroportu Baukau neebe prosesu lao hela.
(alb)
