DILI, STLTIMORLESTE.com – Primeiru Ministru (PM), Kay Rala Xanana Gusmão sujere jornalista sira ba husu Ministra Saude, Elia dos Reis Amaral kona-ba kestaun sosa kareta Land Cruiser, tanba nia (PM, Xanana-Red) la hatene informasaun ida nee.
Xefe Governu hatoo kestaun nee ba jornalista sira, bainhira remata halo enkontru semanal ho Prezidente Republika, Jose Ramos Horta iha palasiu Prezidensial, Nicolau Lobato, Bairru Pite, Dili, Kinta (16/10/2025) hatete, liga ho politika Ministra Saude atu sosa karreta Land Cruiser ida nee husu direita ba Ministra, tanba saida hakarak sosa atu ba pasiar ka oinsa.
”Ba husu ba nia (Ministra Saude) tanbasa mak sosa karreta Land Cruiser. Nia sosa Land Cruiser atu ba pasiar karik,” dehan PM, Xanana.
Xefe Governu mos husu ba jornalista sira Land Cruiser nee mak saida, no sosa karreta Land Cruiser sosa hira. Saida mak Land Cruiser nee, sosa hira presiza hatene.
Entretantu antes nee, Prezidente Republika, Jose Ramos Horta kontra politika Ministeriu Saude sosa karreta Land Cruiser, tanba nee Xefe Estadu hatete sosa karreta foun atu halo saida, ambulansia multi funsaun nee importante no urjente maibe bele salva ema.
,”Nee hau kontra 100 pursentu, se Ministra Saude hakarak, hau fo hau nia Jep, Ambulansia multi funsaun nee importante no urjente, ambulansia multi funsaun nee diak liu tan, bele salva ema, dehan PR Horta.
Xefe Estadu hatete, fiar katak Primeiru Ministru, Kay Rala Xanana Gusmao sei koa tiha orsamentu neebe tau tiha ona ba sosa karreta.
,”Lae, hau hanoin buat ruma sala karik, hau hanoin maun boot Primeiru Ministru sei koa tiha, Hau kontra, karreta bara-barak loos nee, sosa karreta foun halo saida. Foin daudaun Parlamentu Nasional mos kansela tiha ona karreta ba Parlamentu Nasional, agora ama Ministra hakarak sosa fali,”hatete Xefe Estadu.
Jornalista: Emerenciana Pinto
Editora: Carme Ximenes
