DILI, STLTIMORLESTE.com – Primeiru Ministru (PM), Kay Rala Xanana Gusmão sei viajen ba Londres, hodi hasoru malu ho advogadu neebe apoiu Timor Leste (TL) iha negosiasaun ho Australia.
Kestaun nee Xefe Governu hatoo ba jornalista sira bainhira remata halao enkontru semanal ho Prezidente Republika, iha Palasiu Prezidensial, Nicolau Lobato, Bairo Pite, Dili, Kinta (04/09/2025).
“Hau mos informa ba Prezidente Republika iha loron 15 ba londres, ba hasoru malu ho ita nia advogadu sira neebe ajuda ita iha tempu rekonsiliasaun ho Australia, tanba Tim ekipa grupu husi Indonezia mai hasoru malu tiha ona haree ba katak, iha duni vontade atu koalia formal ona laos hanesan babain hasoru malu koalia iha han hemu hamutuk nee lae, maibe formal ona iha ona konkordansia katak tinan ida nee too Dezembru sei iha tan enkontru ida, tanba nee mak hau tenke ba hodi prepara diskute ita nia advogadu sira,” dehan PM, Xanana.
Xefe Governu dehan, ekipa halo ona enkontru formal ida, deside katak iha Dezembru sei iha tan enkontru ida, tanba nee Primeiru Ministru sei viajen ba Londres hodi hasoru malu ho advogadU neebe apoiu Timor Leste hodi halo preparasaun. Ba para dIskute ho advogadu sira tanba negosiasaun sira hanesan nee advogadu ida idak defende ba ida nee, no balu defende iha neeba, tanba nee presiza iha preparasaun.
“Neebe hau sei ba, Prezidente Republika ba fali ONU nian, Prezidente Republika mak sei ba hau la ba, ida nee deit mak hau informa ba Prezidente Republika,” dehan PM, Xanana.
Xefe Governu hatete, ba ONU Primeiru Ministru sei la partisipa enkontru, maibe Prezidente Republika Jose Ramos Horta mak sei ba.
Jornalista: Emerenciana Pinto
Editora: Carme Ximenes
