DILI, STLTIMORLESTE.com – Tuir estandar iha Prizaun Suai, tuir lo-loos akumula deit dadur hamutuk nain 75, maibe liu ona husi numeru refere, iha dadur balu tenke halo fali transferensia ba iha Prizaun Gleno.
“Prizaun Suai iha dadur hamutuk 123, husi numeru nee iha prizaun Preventiva nain 17 no restu husi nee mesak prizaun kondenadu, iha nain 11 mak halo transferensia ba Prizaun Gleno, oras nee daudaun hela deit 123,” dehan Diretor Prizaun Suai, Rui Gonsalves ba STL liu husi telefone, Kinta nee (07/08/2025).
Tuir nia, razaun halo transferensia dadur sira husi Prizaun Suai ba iha Prizaun Gleno, tanba dadur barak liu mak iha Prizaun Suai fatin la sufisiente. No tuir estandar neebe iha, tuir lo-loos Prizaun Suai akumula deit dadur hamutuk nain 75.
Esplika, oras nee daudaun Prizaun Suai iha bloku lima no tuir estandar neebe iha kada bloku ida ema nain 5 mak akumula iha neeba, maibe momentu neeba kada bloku ida bele akumula ema nain 8 too nain 9, tanba nee mak iha planu hodi halo transferensia.
Reforsa, Prizaun Suai iha mos dadur feto ida neebe tama hela iha Prizaun Suai ho Prizaun Preventiva ho razaun Julgamentu besik no besik mos familia sira tanba nee mak tau iha neeba. Maibe se bainhira julgamentu hotu ona desizaun sai mak foin haree fali.
Tuir dadus neebe iha, oras nee daudaun Guarda Prizional hamutuk nain 46 mak halao servisu iha Prizaun Suai hodi tau matan ba dadur sira.
Iha fatin ketak, Diretor Prizaun Gleno, Cristianho Salsinha dehan, foin lalais sira simu dadur transferensia dadur nain 11.
“Foin lalais ami simu dadur transferensia husi Prizaun Suai mai iha Gleno hamutuk nain 11, razaun transfere mai tanba iha Prizaun Suai Over capasity,” dehan Cristianho.
Nia hatutan, oras nee daudaun iha Prizaun Gleno dadur hamutuk 105, iha feto 20, iha Prizaun preventiva nain 4 no restu husi nee Prizaun kondenadu.
Esklarese tan, iha Guarda Prizional hamutuk 36 no guarda estruidu hamutuk 23 mak halao knaar iha neeba.
Aleinde nee, haree ba kondisaun Prizaun sira nian, Ministru Justisa, Sergio Hornai dehan, iha planu atu oinsa harui prizaun ida iha Weberek hodi akomula dadur sira.
“Iha ekipa tekniku balu halao hela servisu, iha kestaun balu tekniku sira halao hela servisu, hanesan agora daudaun ita haree hela sentru reintrasaun sosial ka sentru Prizional neebe ita atu halo iha Weberek nian, tama ona iha Konsellu Administrasaun Fundu Infraestrutura nia servisu atu oinsa atu lao ba oin, “Dehan MJ.
(ter)
