DILI, STLTIMORLESTE.com – Oras nee daudaun Prizaun Suai akumula prizioneiru hamutuk 127, husi numeru nee iha Prizaun Preventiva no mos Prizaun Kondenadu.
Tuir Diretor Prizaun Suai, Rui Gonçalves katak, Prizaun Suai oras nee daudaun akumula kondenadu hamutuk nain 127, maioria mane.
“Prizaun Suai agora daudaun tau dadur hamutuk 127, iha Prizaun Preventiva hamutuk 15 no Prizaun Kondenadu hamutuk 112,” dehan Rui ba STL liu husi telefone, Kuarta (23/04/2025).
Nia hatutan, Prizaun Suai oras nee daudaun la iha ona difikuldade kona-ba transporte no mos numeru ba Guarda Prizional, tanba foin lalais numeru ba Guarda Prizional aumenta ona.
No Prizaun Suai oras nee daudaun iha Guarda Prizional hamutuk 46, mane hamutuk nain 40 inklui feto nain 6, no Guarda prizonal tuan hamutuk 35, no foin daudaun rekruta nee hamutuk 1, feto rua no mane 9, inklui Diretor mak hamutuk 46.
Maibe hahu husi Janeiru too mai agora kondenadu sira seidauk hetan formasaun ruma neebe mai husi liur. Maibe atividade sira neebe Guarda Prizional sira prepara kontinua lao, hanesan atividade formasaun pratika ba produsaun batako no formasaun pratika hortikultura kuda modo.
Iha fatin ketak, Diretor Prizaun Gleno, Cristiano Salsinha dehan, kondenadu sira kada loron halao atividade neebe iha.
“Sira feto halao atividade hanesan kustureiru kulinari no tuir alfabetizmu, sira mane nee tuir kona-ba karpintaria no mos alfabetizmu no mos esperitual nian,” dehan nia.
(ter)
