DILI, STLTIMORLESTE.com – Problema Autor Judisiariu nain ida neebe sai viral, husi parte Ministeriu Publiku nian liu husi Prokurador Jeral Republika (PJR) deklara katak, prosesu refere iha ona faze averiguasaun.
“Klaru laos Konselhu Superior Ministeriu Publiku atu nonok deit, Konselhu halo ona reuniaun kona-ba kestaun nee, agora averiguasaun lao hela,” dehan Prokurador Jeral Republika, Nelson de Carvalho ba jornalista sira iha Salaun Mauhoka, Surikmas, Tersa nee (05/08/2025).
Nia hatutan, kona-ba Konselhu atu foti desizaun banhira, ida nee sei haree depois mak Konselhu foin foti.
Esplika, Prokurador refere mos halo keixa iha PSIk kontra fali alin feto nee, no keixa nee PSIK mos hatama ona ba iha Ministeriu Publiku, tanba Ministeriu Publiku mak hanesan nain ba asaun penal.
Antes nee Advogada JU,S, Adelina Meluk deklara katak, depois de akontesimentu, joven feto ida ba hatoo iha JU,S, tanba nee iha loron 2 fulan Julhu sira hatoo keixa ba iha Konselhu Superior Ministeriu Publiku.
“Iha loron 2 fulan Julhu, JU,S reprezenta vitima hatama keixa ba Konselhu Superior Ministeriu Públiku liu husi rekerimentu formal dirije ba Sr. Prokurador Jeral, hamutuk video no evidensia seluk,” dehan nia.
Hatutan, vitima rasik la fahe ba publiku vídeo nee, maibe submete vídeo ba PGR. Tempu hanesan vitima nunka husu osan ba Prokurador hanesan asaun atu hapus vídeo. Tuir lo-loos au kontrariu, Prokurador mak kontaktu vitima beibeik no oferese osan atu nia la halo keixa ba ninia sala.
Informa tan, entre 2 Julhu too agora seidauk rona informasaun ruma kona-ba pedidu halo ba Konselhu Superior Ministeriu Publiku nian, no tuir informasaun neebe sira hetan, seidauk inklui pedidu tama iha loron 2 Julhu iha ajenda Konselhu Superior no seiduak loke prosesu dixiplinar hasoru Prokurador refere.
Bainhira hetan pedidu apoiu feto nee, JU,S hahu akonsela vitima atu uza mekanizmu prosesu dixiplinar ho fiar katak Konselhu no PGR sei foti asaun lalais hodi garante profisionalizmu husi sira nia membru. Tempu hanesan haree katak mane nee autor judisial, ho formasaun barak no mos iha konhesimentu diak iha area direitu umanus, sira iha fiar ba ninia matenek no katak nia sei rekonhese ninia sala no sei kaer ninia responsabilidade.
Maibe haree katak, suspeitu asediu seksual nee abuza sistema judisial hodi persegue vitima no koko defama vitima nia naran, vitima rasik hakarak ezije responsabilidade tomak ba asaun hotu hotu hasoru Sr. Prokurador nee.
Akresenta tan, tempu too ona atu hapara mane sira neebe sai suspeitu ba kazu asediu seksual inventa ka habosok istoria kona-ba feto nuudar estratejia defeza. Habosok feto mak halo sala viola lei sivil no kriminal no JU,S prontu atu garante katak ema sei la abuza lei no sistema judisial hodi sai instrumentu privadu ba ninia defeza.
Informa tan, Prokurador iha direitu atu defende aan husi alegasaun dixiplinar asediu seksual no tuir regulamentu Ministeriu Publiku nian, nia sei iha oportunidade ba ida nee.
Feto vitima uza ninia direitu atu keixa Prokurador nee no uza ninia matenek atu halai sees husi situasaun asediu seksual.
Maibe haree katak, Prokurador refere ikus liu uza keixa krime nudar maneira perseguisaun hasoru vitima, entaun JU,S mos analiza filafali kazu hosi perspetiva direitu kriminal no depois, konsulta ho vitima, vitima deside atu halo denunsia krimi hanesan, krimi exibicionismo, krimi pekulatu krime koasaun e krime denunsia kaluniosa.
Aleinde nee vitima mos sei konsidera lori kazu difamasaun sivil hodi husu indeminizasaun ba Sr Prokurador refere, haree katak nia rasik kontaktu vitima nia familia hodi bosok istoria katak sira nain rua namora no vitima mak buka mane kaben-nain no ikus hakarak halo prostituisaun ho mane refere.
Sira mos husu ba membru hotu husi Konselhu Superior Magistratura Judicial, Ministeriu Publiku, Konselhu Superior Defensoria Publika, Ministru Justisa no Koordenadora Reforma Judisial atu haree ho seriu problematika asediu seksual komete husi autor judisiariu, inklui halo formasaun kona-ba kestaun nee, estabelese sistema internal hodi simu keixa konfidensial husi publiku no foti asaun dixiplinar haree ba gravidade husi aktu refere.
(ter)
