DILI, STLTIMORLESTE.com – Problema roo relasiona ho iklima tempu udan laloran boot, tanba nee iha tinan 2025 Loja Toko Lay la hatama sementi.
“Problema neebe ami hasoru mak ami la hetan roo tula, tanba iklima udan beibeik, laloran boot nee mak problema oituan buka roo sira mos tauk, tanba nee durante tinan 2025 ami nunka hatama sumenti tanba problema roo,” hatete responsavel Loja Toko Lay, Antoni Paris Nahak ba STL iha knaar fatin, Kuarta (12/03/2025).
Nia deklara, sementi neebe faan iha fulan Janeiru tinan nee restu husi tinan 2024 nian mak faan, maibe ba tinan 2025 nian seidauk hatama. Agora foin hetan roo tuir orariu, aban foin too iha nee tula sumenti, nee primeiru sumenti ba tinan 2025 nian.
Nia sublina, konaba folin sementi mantein folin iha tinan kotuk nee jumbu ida isi 50 faan US$ 195, nunee saka ida folin US$ 3.90 sentavus, kuandu ema hola ida-ida saka US$ 4.00.
Tanba nee konsumidor sira mai atu sosa sementi hatete ba sira sumenti hotu, nunee sira fila fali ba fatin seluk hodi sosa. Tanba nee Loja Toko Lay buka meus aban sementi too Timor.
Nia dehan, kuandu iklima diak kada tinan sementi tama hela deit, maibe tinan nee susar tanba iklima nomos laloran boot, problema oituan.
(joa)
