BAUKAU, STLTIMORLESTE.com – Autoridade Munisipiu Vikeke rekonhese fasilidade sanitariu iha Hospital Internamentu Vikeke, durante nee la funsiona hodi difikulta pasiente sira, maibe rezolve ona.
Prezidente Autoridade Munisipiu Vikeke, Francisco Cruz Simões de Gonzaga Soares hateten, problema neebe Hospital Internamentu Vikeke infrenta kona-ba fasilidade sanitariu neebe Deputadu husi Bankada FRETILIN Dario Madeira deklara liu husi plenaria iha Parlamentu Nasional (PN) nee loos, no durante nee fo impaktu ba pasiente baixa sira, tanba lao distansia metru 50 hafoin soe foer kiik no boot, maibe problema nee la infrenta durante fulan 3, maibe akontese hahu iha fulan Novembru 2025.
“Hau asiste informasaun nee iha media, hau koalia kedas ho Diretor, maibe sira halo tiha ona limpeza, loos duni sira infrenta karreta supa foer nee dehan susar oituan, maibe sira hamoos tiha ona sintina nee, neebe hau dehan ba nia kuandu iha difikuldade tenke hatoo labele nonok ema levanta mak foin halai,” Francisco hateten ba STL liu husi telefone, Kinta (18/12/2025).
Nia sublina, problema fatin sanitariu iha Hospital Internamentu Vikeke neebe durante nakonu ho foer, tanba Servisu Munisipal Saude Vikeke laiha transporte Governu foti foer husi fatin sanitariu nomos durante nee la kontratu kompanhia ruma tau matan ba asuntu refere, maibe bainhira iha ona nesesidade prezisa mak aluga deit transporte privadu foti foer husi fatin sanitariu iha Munisipiu Vikeke, hodi halo atuasaun ba foer sira iha fatin sanitariu, maibe too momentu neeba Servisu Munisipal Saude Vikeke la hetan aluga transporte ba asuntu refere nunee labele responde sedu.
Nia defende, kauza husi fatin sanitariu iha Hospital Internamentu Vikeke nakonu, laos la kontrola husi Diretor Servisu Munisipal Saude Vikeke, maibe nee kauza husi fator umanu neebe difisil atu kontrola.
“Durante nee Diretor servisu hela halao nia servisu ho didiak, maibe nia problema mak viral kona-ba sanitasaun nee deit, se nia servisu la diak ema halerik, mais ida nee haleik husi parte ida deit dala ruma iha razaun balu,” Francisco argumentu
Prezidente Autoridade Munisipiu Vikeke nee agradese ba Deputadu Dario Madeira, tanba levanta ona asuntu refere iha Parlamentu Nasional, mak iha loron 16 Dezembru nee parte Servisu Munisipal Saude Vikeke ho makina hamoos ona foer sira husi fatin sanitariu, iha Hospital Internamentu Vikeke.
“Ita agradese ba Deputadu hanesan Povu nia ibun, matan no tilun, ita husi Autoridade kontinua nafatin tau matan ba ida nee no ita sei konsulta ho parte hotu oinsa halo Quality Control,” Francisco komenta.
Nia katak, atu antisipa ba foer sira iha fatin sanitariu iha Hospital Internamentu Vikeke, Autoridade Munisipal seidauk iha planu atu sosa kareta hodi deskata iha Servisu Munisipal Saude Vikeke, tanba Autoridade Munisipiu seidauk preve orsamentu, maibe sei koordena ho kompanhia sira hodi haree asuntu refere bainhira iha nesesidade.
Nunee ba Autoridade Munisipiu Vikeke atu la akontese problema hanesan mak, importante servisu hamutuk hodi kontrola, tanba Hospital Internamentu refere kiik no kondisaun antigu nian, maibe Ministeriu Saude sei responde infraestrutura foun ba Servisu Munisipal Saude Vikeke neebe ho estatutu Hospital Munisipal.
Jornalista: Tomas Reis
Editora:Carme Ximenes
