BAUKAU, STLTIMORLESTE.com – Natar kultiva epoka iha Munisipiu Baukau kobre natar hamutuk hektare 8,265 ho rezultadu produsaun hare kulit tonelada 29,959.
Diretor Servisu Munisipal Agrikultura Baukau, Agostinho Ximenes esplika, iha epoka tinan 2025 apoiu fila rai husi Governu ba agrikultores sira iha Munisipiu Baukau ba area kultiva hektare rihun 5, maibe iha rezultadu kultiva sae ba hektare 8,265, tanba restu inisiativa mai husi komunidade agrikultores rasik.
“Area rihun 14 hektares nee hela 6,167 mak sei abandona, maibe nia rezultadu kolheta iha Baukau laran tomak iha 29,959 toneladas hare kulit neebe ita hetan iha epoka ida nee, neebe tinan ida nee progresu servisu lao diak,” hateten Agostinho ba STL iha knaar fatin Vila Nova, Baukau, Kinta (11/09/2025).
Nia sublina, Munisipiu Baukau iha natar potensialidade ba hare kulit rejistu rihun 14 resin, maibe iha tinan nee kultiva deit hektare rihun 8 resin enkuantu hektare rihun 6 resik kontinua abandona, tanba kondisaun irigasaun kontinua problema.
Maibe nia rekonhese, natar hirak neebe eziste iha parte foho Postu Laga, Kelikai Antigu, Kelikai, Baguia neebe durante nee depende deit ba udan been kontinua sai abandona bainhira udan bee la-diak.
Enkuantu natar hirak neebe eziste iha Postu Administrativu Venilale abandona, tempu badak sei funsiona hikas tanba irigasaun Galata konklui ona no natar iha Baukau Vila daudaun sei abandona bainhira konstrusaun irigasaun Uatu-ua Modobuti konklui sei funsiona hikas hodi aumenta numeru produsaun.
Tanba nee husu komunidade agrikultores sira no autoridade Suku sira kontinua koopera projetu konstrusaun irrigasaun Uatu-ua Modobuti nunee finaliza tuir kontratu neebe selebra ona hodi fo vantajen ba Povu no Nasaun liu husi komsumu produtu rasik.
Jornalista: Tomas Reis
Editora: Domingas Gomes
