DILI, STLTIMORLESTE.com – Profesores kolokadu neebé hetan kolokasaun husi Governu hodi halao servisu hanesan manorin nain bá iha munisipiu too area rurais, agradese bá oportunidade neebé oferese husi Ministériu Edukasaun (ME).
Tuir Profesora Kolokadu Carolina Soares de Deus, neebé hetan kolokasaun iha loron 4 Outubru 2024, hodi bá iha Eskola Ensinu Baziku Sentral (EBC – sigla português) no 1119 de Liçapat, Postu Administrativu Hatolia B, Munisipiu Ermera hatete, nia parte agradese tebes, tanbà bele hetan oportunidade diak neebé durante nee nia buka no hein hela no ikus hetan duni rezultadu liu husi vaga.
“Hanesan profesores kolokadu, hau nia sentimentu kona-ba servisu nee, hau agradese tebes tanba bele hetan oportunidade diak neebe durante hau buka no hein, no ikus hetan duni rezultadu diak husi vaga neebe Governu liu husi Ministeriu Edukasaun oferese mai ami,” dehan nia bá jornalista STL liu husi via WA iha Liçapat, Postu Administaritivu Hatulia, Munisipiu Ermera, Sesta (23/05/2025).
Nia hatete, maske kolokasaun servisu nee dook husi hela fatin no familia, tanbà tenke hasoru ambiente foun maibe ida nee la sai hanesan kestaun atu lakon vontade servisu nian, tanbà ida nee sai hanesan responsabilidade bá knaar neebé iha.
Nia afirma, kona-ba ambiente foun nia parte sente kontente no konfortavel tebes hamutuk ho manorin seluk nomos komunidade sira.
“Iha ambiente foun nee, hau sente kontente no konfortavel tebes, tanba unidus tebes ho maluk manorin sira seluk no komunidade sira, liu-liu autoridade lokal sempre tau matan no seguransa kontroladu tebes,” nia tenik.
Nia tenik, unidus ho familiar nee mak sente kontente tebes, maibe iha sorin seluk sente laran susar oituan, tanbà dook husi familia. Nunee knaar nuudar inan tenke dook husi familia no susar tebes atu tau matan bá oan sira.
“Distansia neebe dook halo ami sente hanesan ami abandona los tiha ami nia oan sira,” nia hatete.
Nia afirma, aleinde distansia dook husi familia, profesor kolokadu sira mos triste ho hela fatin neebé sira aluga ho folin US$ 50 kada fulan, maibe bee moos laiha no eletrisidade sempre mate entre loron 3 ka 4 mak foin lakan fali. Iha parte nee mak halo profesores kolokadu sira sente triste oituan.
(dom)
