Profesor Sira Agradese Governu Prosesu Fali Salariu 13

DILI, STLTIMORLESTE.com – Profesor sira agradese ba Ministeriu Edukasaun (ME) neebe promote sei kompleta salariu desimu terseiru ka 13 ho porsentu 68 ba profesor sira fulan ida nee.

Antes nee iha Dezembru 2025 nia laran profesor ou kliente barak mak triste no laran susar, tanba bainhira bá dada osan desimu terseiru nian iha makina ATM sai mai la kompletu.

Tuir Profesor no Kliente BNCTL, Paul da Costa dehan, nia parte agradese no kontenti, tanba governu bele prosesu fali pagamentu salariu terseiru desimu ba sira neebe simu la kompletu iha fulan kotuk.

“Nudar sidadaun no hanesan profesor hau agradese no obrigado bá governu, tanba bele prosesu fali pagamentu salariu terseiru desimu nee mai ami Professor sira. Tanba ami barak mak triste no la satisfas,” dehan nia bá STL iha Timor Plaza, Sesta (09/01/2026).

Nia hatutan, tama bá tinan foun nee ema hotu presiza osan hodi selu oan sira nia eskola. Neebe ho salariu terseiru desimu hamutuk ho salariu Janeiru nian nee bele selu tiha labarik sira nia osan eskola.

Nunee mos Profesor i Kliente Fransisca da Costa, agradese bá governu ida nee, bele halo fali pagamentu salariu terseiru desimu nian. Hanoin osan nee kala lakon leet deit ona, maibe rona fali governu dehan halo fali prosesu pagamentu hamutuk ho salariu Janeiru nian, nee hanesan novidade diak ida.

“Hau hakfodak bainhira rona novidade nee, sentimentu triste kahur ho kontenti rona dehan sei prosesu fali hamutuk salariu fulan Ida nian,” dehan nia.

Nia hatete, iha fulan kotuk nee simu osan la kompletu. Momentu nee foti deit US$ 90 husi makina ATM.

Nia afirma, desimu terseiru nee ema nia direitu, needuni labele halo lakon leet deit. Maibe agradese tanba governu bele prosesu fila fali.

Entretantu antes nee Diretor Nasional Rekursu Umanu iha Ministeriu Edukasaun, João Amaral hatete, kona-ba salariu desimu terseiru ba profesor sira, ME halo ona pagamentu 32% ba profesor ida-idak iha Dezembru, restu 68% halo fali iha Janeiru laran.

“Restu 68% iha Janeiru nia laran, ita sei halo kompleta. Agora dadaun ita iha lista fiksu ona no halo ona kordenasaun ho Ministeriu Finansas liu-liu pagamentu perol hodi identifika sira neebe seidauk, ita bele kompleta 68 porsentu, inklui ho sira-nia salariu ba Janeiru nian,” dehan nia ba jornalista sira nee.

Nia haktuir, aprovasaun salariu désimu terseiru husi Konsellu Ministru, maibe kona-ba pagamentu desimu terseiru fila fali ba Ministrriu ida-idak nia responsabilidade.

(dom)