DILI, STLTIMORLESTE.com – Tuir planu profesores husi Ensinu Tekniku Vokasional (Tekvo) hamutuk 150 too 180 sei tuir formasaun ba programa produtivu.
“Eskola Tekvo nee ita tinan-tinan sempre fo hela formasaun ba programa produtivu, kona-ba formasaun programa produtivu nee liu husi INFORDEPE mak sei halo, maibe koopera ho parseiru sira fo formasaun ba ita nian profesores Tekvo sira, maibe tuir ita nian planu neebe iha nee pur volta 150 ou 108 hanesan mak sei tuir formasaun ba programa produtivu, neebe husi INFORDEPE mak sei halo,” dehan Diretor Nasional Ensinu Sekundariu no Tekniku Vokasional, Fernando Mouzinho Gama ba STL, Kuarta nee (09/04/2025).
Fernando dehan, atu halo programa ida nee sei halao husi INFORDEPE, tanba halao formasaun ba profesores sira nee INFORDEPE ninia kompetensia, neebe halo kooperasaun neebe mak diak ho parseiru sira, bainhira sira husu dadus, nee husi Diresaun Tekvo bele fornese dadus ba sira, ba area neebe mak atu halo formasaun.
Nunee mos Adjuntu Diretor Eskola Hotelaria no Turizmu iha Bekora, Charles F. Guterres hatete, formasaun ba profesores iha area produtiva nee importante, maibe ida nee kompetensia husi ME nian liu husi INFORDEPE neebe durante nee fo ona formasaun ba profesor sira iha Tekvo.
“Hau hanoin kona-ba formasaun ba profesores iha area produtiva nee importante, maibe ida nee kompetensia husi ME nian liu husi INFORDEPE neebe durante nee fo ona formasaun ba profesores sira iha Tekvo,” nia esplika.
Entretantu Diretor TLCE, Jose Monteiro hatete, formasaun ba profesores sira nee tenke halao nafatin, hanesan formasaun ba lingua no formasaun area produtivu sira iha Ensinu Tekniku Vokasional.
“Hau hanoin formasaun ba ita nian profesores sira nee mais importante tebes-tebes, tantu iha lingua no area produtivu sira iha ensinu Tekvo,” nia haktuir.
(jac)
