DILI, STLTIMORLESTE.com – Profesores 30 resin husi Ensinu Baziku Central (EBC – sigla português) iha Munisipiu Likisa prepara tama ba reforma iha tinan oin.
Diretor Servisu Edukasaun Munisipiu Likisa, Julio da Silva dehan, difikuldade neebe edukasaun munisipiu nee enfrenta mak kona-ba profesores idade avansadu sira, tanba idade avansadu nee ema tenke troka ona.
“Maibe kona-ba atu reforma nee kompetensia husi Ministériu ninia, tanba sira mak sei halo kolokasaun ba ita nian profesores 30 resin sira nee obrigatoriu,” dehan Diretor Servisu Edukasaun Munisipiu Likisa ba jornalista STL liu husi telefone, Sesta (22/08/2025).
Julio akresenta, profesores 30 resin nee mak tama reforma obrigatoriu, tanba nee sira nian idade avansadu los ona no sira hanorin iha ensinu baziku. Agora atu substitui iha sira nian fatin nee kompetensia ME nian, bazeia ba rekrutamentu profesores neebe mak daudaun nee sira halo.
Entretantu Diretor Servisu Edukasaun Munisipiu Ainaro, Patricio da Costa Magno hatete, profesor iha Ainaro hamutuk 129 mak tama ona ba idade reformadu ninia, tanba sira idade tiha ona.
Iha fatin seluk, Diretor Nasional Rekursu Umanu iha Ministeriu Edukasaun, João Amaral hatete, profesores sira nian karta rekerimentu nee rekere ba iha SEM, depois mak husi SEM submete mai iha rekursu umanu nasional, tanba nee kada loron numeru profesores neebe hakarak atu reforma sempre aumenta.
(jac)
