DILI, STLTIMORLESTE.com – Profesores husi ensinu baziku too ensinu sekundariu hamutuk 3,800 sei reforma iha tinan 2026.
Prezidente Komisaun G neebe trata asuntu Edukasaun Juventude Kultura nomos Sidadania iha Parlamentu Nasional (PN), Deputadu Armando Lopes hateten, Komisaun G simu ona dadus kona-ba profesores sira neebe sei reforma iha tinan 2026.
Tuir nia, profesores barak sei reforma iha tinan oin no bele prezudika prosesu aprendizajen ba estudante sira, tanba nee Ministeriu Edukasaun presiza antisipa halo rekrutamentu profesores molok aplika lei reforma obrigatoriu ba manorin sira.
“Ami hetan ona dadus kompletu no ami rekomenda ona ba Governu liu-liu ba Ministeriu Edukasaun hodi antisipa molok tama ba tinan 2026 atu implementa lei reforma obrigatoriu ba profesores sira,” hatete Deputadu Armando Lopes ba jornalista sira iha resintu PN, Kuarta (23/04/2025).
Nia hatutan, Ministeriu Edukasaun presiza antisipa numeru profesores menus molok ita tama ba reforma obrigatoriu ba profesores sira liu husi halo rekrutamentu ba profesores sira nunee bele garante atividade prosesu aprendizajen tenke lao nafatin.
“Labele too iha neeba mak ita foin reforma, ita foin buka kandidatu maibe prosesor menus bele sai problema ba ita, tanba ita nia oan sira nee bele sai vitima tanba afeita ba prosesu aprendizajen no ezame,” tenik nia.
(jac)
