DILI, STLTIMORLESTE.com – Profesores 50 resin husi eskola sira Munisípiu Likisa sei tama ba iha idade reforma, no ba oin presiza profesores neebe substitui hikas iha sira nia fatin.
Liafuan nee haktuir husi Diretor Servisu Edukasaun Munisipiu Liquica, Julio da Silva ba STL via-telefoni, Segunda (06/10/2025).
Nia dehan, presiza atu koloka tan professores hodi bele subtitui fali professores neebe tama ba reforma.
“Ita iha 50 resin mak tama ba idade reforma, nunee mos ita nian professores moras prelongada nee ita seidauk identifika tanba balun diak, no balun moras fali. Agora konaba ita nian eskola hira mak atu aumenta professores, nee ita seidauk iha dadus tanba foin mak identifika. Dala ruma Professor nee moras diak tiha, depois moras fali, nee duni ita seidauk bele hatene ninia numeru lolos,” dehan nia.
Julio afirma, too ohin loron seidauk hatene eskola hira mak presiza aumenta professores iha Munisípiu Liquica, tanba dadaun nee parte husi inspektor eskolar sira identifika fila iha eskola sira katak, eskola ida neebe mak sei menus profesores ba oin bele aumenta tan profesores.
Nunee mos Diretor Rekursu Umanu Nasional iha ME, Joao Amaral hatete, professores sira nian karta rekerementu nee rekere ba iha edukasaun munisipiu depois mak submete mai iha rekursu umanu nasional, tanba nee kada loron nee numeru professores neebe hakarak atu reforma, lori sira nian karta rekerementu nee sempre aumenta.
Entretantu Diretor Servisu Edukasaun munisipiu Ainaru, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu.
Jornalista: Jacinta Sequeira
Editora: Domingas Gomes
