Profesores 900 Sei iha Bolsa Laran

DILI, STLTIMORLESTE.com – Bolsa Kandidatu Profesores neebe mak Ministeriu Edukasaun (ME) rekruta iha tinan 2024 hamutuk 900 resin sei iha bolsa laran. Sira nee sei substitui fali ba sira neebe atu reforma obrigatoriu iha 2026.

Tuir Diretor Rekursu Umanu Nasional iha ME, João Amaral dehan, bolsa kandidatu neebe rekruta iha 2024, falta 900 resin mak sei iha bolsa laran. Sira hirak nee sei substitui fali ba sira neebe atu reforma obrigatoriu.

“Reforma obrigatoriu nee 1,450, nee mak reforma obrigatoriu iha fulan Janeiru 2026. Ida agora ami lao nee, balun tama iha reforma obrigatoriu no balun seidauk. Agora dadaun ita iha bolsa kandidatu neebe ita rekruta iha tinan kotuk 2024 mak iha bolsa laran hela. Ita sei falta 900 resin sei iha laran, hirak nee ita sei halo subtitui ba sira,” nia informa ba STL, Tersa (09/09/2025).

Nia akresenta, tuir lo-loos bolsa kandidatu profesores rekruta iha 2024 nee 1000 resin, maibe tanba 187 priense ona termu aseitasaun, entaun 900 resin maka sei iha bolsa nian laran. Nee ba iha nibel ensinu baziku ninia, nee duni rezerva ida reforma nian fatin nee iha ona.

Iha fatin seluk, Diretor Servisu Edukasaun Munisipiu Likisa, Julio da Silva dehan, profesores 30 resin nee mak sira tama reforma obrigatoriu, tanba nee sira nian idade avansadu los ona, no sira hanorin iha ensinu baziku. Atu substitui fali iha sira nian fatin, nee kompetensia ME nian, bazea ba rekrutamentu professores neebe mak dadaun nee sira halo.

Jornalista: Jacinta Sequeira
Editora: Domingas Gomes