DILI, STLTIMORLESTE.com – Profesores 97 husi Munisipiu Bobonaro sei tama reforma obrigatoriu iha Janeiru 2026 no nain 14 moras prelongada.
Haktuir Diretor Servisu Edukasaun Munisípiu Bobonaro, Miguel Freitas ba jornalista STL liu husi telefone, Segunda (27/10/2025).
Nia katak, reforma ida moras prelongada nee 14, agora reforma obrigatoriu nee hamutuk 97.
“Nee la sura ho numeru moras prelongada 14 nee, ida nee dadus ketak ida. Lista ida moras prelongada nee aban ami sei lori ba iha rekursu umanu ME nian, tanba nee ita nian professores 97 nee sei tama reforma iha Janeiru 2026,” nia informa.
Nia salienta, bainhira professores sira nee reforma, presiza subtitui fali sira nian fatin. Nudar Diretor sei halo pedidu ba ME nasional, atu nunee bele subtitui hikas iha professores reforma sira nian fatin.
Iha fatin seluk, Diretor Rekursu Umanu Nasional iha ME, João Amaral antes nee dehan, realidade lo-loos katak, sira laiha ona kondisaun para atu hanorin, tanba sira mai hanorin mos balun la mai liu ona, tanba nee husi rekursu umanu ME halo hela servisu ida para atu rekolha lalais dadus sira nee para sira bele hatene.
Jornalista: Jacinta Sequeira
Editora: Domingas Gomes
