DILI, STLTIMORLESTE.com – Profesores neebe koloka iha faze primeiru, segundu no terseiru ba iha Munisipiu Ainaro, balun laiha fatin atu hela, tanba nee sira tenke hela iha kos, no balun komunidade mak oferese fatin ba sira.
Liafuan nee hatoo husi Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Segunda nee (18/11/2024).
“Hau hanoin kona-ba ita nian profesor sira nian hela fatin nee sei nafatin hela deit, balun nafatin hela iha komunidade nia uma, balun hela iha kos, maibe barak mak ita nian komunidade oferese uma ba sira. Total ita nian profesores nain hira mak hela iha kos, nee hau labele fo lai dadus, tanba hau seidauk hatene los. Hela kos nee oituan deit, tanba barak mak komunidade ajuda fo uma ba sira hela,” dehan nia.
Patricio hatutan, kolokasaun profesores iha faze primeiru, segundu no terseiru, Ainaro simu profesores hamutuk 130, agora kona-ba sira nian hela fatin, too agora nia rasik seidauk fo informasaun ruma kona-ba lamentasaun husi profesores sira, liu-liu kona-ba sira nian hela fatin, tanba komunidade oferese fatin ba sira hela.
(jac)
