DILI, STLTIMORLESTE.com – Tuir planu profesores disiplina lima husi Eskola Hotelaria no Turizmu Bekora sei partisipa formasaun iha fulan Marsu tinan ida nee nia laran.
Dehan Adjuntu Diretor Eskola Hotelaria no Turizmu Bekora, Charles F. Guterres ba STL iha nia knaar fatin Bekora, Kinta nee (27/02/2025).
“Profesores sira tuir data tentativa nee sei akontese iha fulan Marsu nia laran, nee formasaun ba area hotu-hotu ou ba materia disiplina idak-idak nian, hanesan disiplina matematika, ingles, kimika, ami nian nee ami haruka profesores ba formasaun nee ami sei haruka profesores ba disiplina kimika, matematika, multimedia, lingua ingles no lingua português,” katak nia.
Nia dehan, ba materia lima nee mak sei haruka profesores tuir formasaun, agora ba seluk nee seidauk ida, koalia kona-ba formasaun produtivu nee tenke kooperasaun ho nasaun seluk, ezemplu tenke halo kooperasaun ho nasaun Indonezia, se lae halo kooperasaun ho Singapura ho Malazia, nee baibain uluk akontese hanesan nee.
“Tanba ita koalia kona-ba materia produtivu, tanba ita Timor nee seidauk iha kondisaun neebe mak diak ba ita nian materia produtivu sira, tanba saida, ita koalia kona-ba materia produtivu nee laos tuir formasaun deit, maibe tuir teoria nee porsentu kiik, nee tenke ba sala pratika hodi halao pratika,” dehan nia.
Iha parte seluk, Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos hatete, ho planu estratejiku sira nee bele haree mos metodu sira nee, karik durante nee ninia sistema ruma ladun diak iha formasaun nee karakter halo mudansa karik liu-liu ba iha jestaun sira.
(jac)
