DILI, STLTIMORLESTE.com – Eskola Sekundáriu Jeral FINANTIL profesores seidauk sufisiente, maibe husi parte eskola nian halo ona pedidu ba Ministériu Edukasaun, husu apoiu profesores.
Tuir Diretor Eskola Sekundariu Jeral FINANTIL, Aniceto Berlelo katak, relasiona ho menus profesores iha sira nian eskola nee hatoo ona pedidu ba Ministériu Edukasaun, hodi nunee bele koloka profesores ba iha sira nian eskola.
“Ami nian profesores la too ka la sufisiente ida, nee ba materia português, tetum, inklui ba materia desportu ninia mos too agora seidauk iha profesores, maske iha, maibe fleksibilidade sira hanorin, espesiál ba materia nee laiha, hau nian pedidu nee ami hatoo ona ba iha Ministeriu Edukasaun nee kleur ona,” dehan Aniceto ba STL, Segunda nee (02/02/2026).
Nia dehan, kona-ba konsesaun eskolar too agora seidauk tama, maibe sira submete ona relatóriu ba iha parte kompetente no osan konsesaun nee rasik seidauk tama, neebe husi parte eskola nian hein deit, espera too tempu husi Ministeriu Edukasaun bele atribui osan ida nee.
Iha parte seluk Diretor Eskola Sekundariu Jeral 10 Dezembru Komoro, Manuel Verdial dehan, sira nian eskola sei menus profesores, kona-ba profesmsores nee sira sei presiza tan profesores ba lian português.
“Ami nian profesores nain rua mak tama ona reforma, profesores nain rua nee ba lian português, nee duni ami husu atu apoiu tan profesores mai iha ami nian eskola,” nia deklara.
Nunee mos Diretor Nasional Ensinu Sekundariu iha ME, Benjamin Gomes da Cruz Fernandes dehan, eskola neebe sei presiza profesores nee, ho rekrutamentu bolsa kandidatu profesores nee bele responde tuir nesesidade husi eskola idak-idak nian.
(jac)
