DILI, STLTIMORLESTE.com – Eskola Sekundáriu Jeral (ESJ) nu. 4 Setembru Balide finaliza ona koreksaun pontus ezame segundu periodu no profesores sira foti ona rekapitulasaun para bele prienxe iha kaderneta eskolar.
Tuir Diretor ESJ nu. 4 Setembru Balide dehan, kona-ba koresaun pontus ezame foin daudaun nee buat hotu lao ho diak, tanba agora daudaun koresaun ba pontus ezame segundu periodu remata ona, ohin iha materia ida, maibe profesor nain mai konfirma tiha ona, tanba nee ita nian koresaun ba pontus ezame finaliza ona.
“Ita nian profesores balun foti ona sira nian rekapitulasaun nee para bele prienxe ba iha kaderneta eskolar, tanba kaderneta ba ita nian estudantes sira mos ita prepara tiha ona, ami nian estudantes sira sei tama fali eskola iha loron 4 fulan Agostu, nee ita nian kalendariu husi Ministeriu Edukasaun, nee duni Segunda hahu tama eskola nee ita nian profesores sira bele prienxe ona valor estudantes ba kaderneta,” dehan Sergio ba jornalista STL iha nia knaar fatin Balide, Kinta nee (31/07/2025).
Nia dehan, agora daudaun total profesores iha eskola ida nee hamutuk 77 no total estudantes hamutuk 2.389, depois de ezame segundu periodu, estudantes sira feriadu no Segunda agora foin tama fali eskola.
Nunee mos Diretor Eskola Sekundariu Nobel da Paz, Jeremias P. de Jesus hatete, koresaun pontus ezame nee seidauk finaliza no sei iha faze koresaun nia laran, tanba nee bainhira remata koresaun mak profesores sira bele hatama valor estudantes nian, ho nunee bele prienxe ba kaderneta.
“Agora daudaun ita nian estudantes sira sei feriadu hela, tanba depois de ezame segundu periodu nian ita nian estudantes sira feriadu no dia 4 Agostu mak sira tama fali eskola, atu nunee ita bele hahu halao aula normal ba estudantes. Kona-ba pontus ezame segundu periodu nian dadaun nee sei iha faze koresaun nian laran, seidauk finaliza, bainhira remata koresaun mak dia 4 Agostu tama fali eskola nee profesores sira bele prienxe ona valor estudantes sira nian ba iha kaderneta eskolar,” nia komenta.
(jac)
