DILI, STLTIMORLESTE.com – Profesores husi Eskola Sekundariu Jeral 10 Dezembru Komoro halo ona koresaun ba pontus ezame segundu periodu.
Asuntu nee hatoo husi Diretor Eskola Sekundariu Jeral 10 Dezembru Komoro, Manuel Verdial ba jornalista STL iha nia knaar fatin Komoro, Kinta nee (24/07/2025).
“Agora ita nian profesores sira halo koresaun ona pontus ezame segundu periodu ninia, agora administrasaun komesa halo ona rekapitulassun no profesores sira lori ona valor mai, depois ita bele haree fali valor sira nee, bainhira remata koresaun mak sei prienxe valor estudantes sira nian iha kaderneta eskolar,” dehan afirma.
Tuir Manuel katak, depois inan aman estudantes sira bele haree oan nian valor iha ezame nee, no haree ba durante partisipa iha prosesu aprendizajen husi estudantes sira too iha rezultadu ba iha ezame agora daudaun, nee duni pontus ezame nee sei iha koresaun nia laran.
“Ita nian estudantes balun neebe ezame uluk nee valor hatama daudaun ona, balun neebe ezame ikus nee sei iha koresaun nia laran, kona-ba susulan nee seidauk, tanba ami sei identifika didiak,” nia informa.
Nia dehan, ezame segundu periodu nee remata tiha ona iha semana kotuk no agora daudaun profesores sira iha faze halo koresaun ba pontus ezame sira nee, koresaun remata mak foin prienxe valor estudantes iha kaderneta.
Iha fatin seluk, Koordenador EBF Fatumeta, José Manuel Pires hatete, estudantes iha EBF nee la halo ezame, maibe sira halo deit avaliasaun, tanba avaliasaun ba estudantes sira nee halao tiha ona iha semana kotuk liu ba.
“Ita nian estudantes iha EBF nee la halo ezame, maibe sira halo deit avaliasaun, tanba avaliasaun ba estudantes sira nee halao tiha ona iha semana kotuk liu ba, tanba estudantes iha EBC sira mak ezame, ami husi EBF nee halo deit avaliasaun ba sira,” nia informa.
(jac)
