DILI, STLTIMORLESTE.com – Estudantes sira mai ho karakter neebe la hanesan, nunee profesores neebe mak hanorin tenke ho fuan boot.
Koordenador Ensinu Baziku Filial (EBF) Fatumeta, Jose Manuel Pires hatoo lia hirak nee ba jornalista STL iha nia knaar fatin Fatumeta, Kinta nee (26/06/2025).
“Ita la husik difikuldade nee lao, nuudar Koordenador hamutuk ho profesores sira, ami nian difikuldades mak estudantes sira nakar, dala ruma sasan eskola nian neebe ita sosa sira halo rahun, liu-liu vidru barak mak sira halo rahun, maibe ita hamutuk ho inan aman detekta estudantes neebe halo sasan eskola nian rahun nee tenke selu, tanba la halo hanesan nee estudante la tauk,”nia esplika.
Nia hatutan, estudantes nee familia barak mai ho karakter neebe mak la hanesan, maibe hanesan profesores, baibain hanorin nee tenke fuan boot, husi edukasaun hatur lei ida katak, zero violensia iha eskola, nee duni profesores sira atensaun katak, maske la ho violensia maibe ho domin boot atu eduka labarik sira nee.
“Estudantes sira nee mai ho karakter neebe la hanesan, maibe ita nuudar profesores tenke fuan boot hanorin labarik sira nee, tuir sira nian karakter neebe mak iha, ita tenke eduka sira, tanba sira mak sai futuru nasaun nian no futuru ba familia nomos igreja nian, se ita eduka mak la ho fuan boot entaun labarik sira ita hanorin sira sente katak la pas ho sira nian kondisaun,” tenik nia.
Nia akresenta, kada loron profesores husi eskola ida hanorin estudantes ho fuan boot, profesores sira nee hanorin diak tebes-tebes, sira hanorin kapas tuir planu aula neebe mak iha.
Iha parte seluk, Koordenadora Pre Eskolar Moris Foun I, Domingas Beatriz da Cunha dehan, hanorin iha pre eskolar nee hasoru labarik kiik, nee profesores sai inan ba sira, tanba sira mai ho karakter neebe la hanesan, balun toman kedas profesores, maibe balun tanis buka inan hakarak tur besik deit.
“Ita hanorin iha pre eskolar nee hasoru labarik kiik, nee profesores sai inan ba sira, tanba sira mai ho karakter neebe la hanesan, balun toman kedas profesores maibe balun tanis buka inan hakarak tur besik deit,” nia afirma.
(jac)
