DILI, STLTIMORLESTE.com – Profesores neebe mak antes nee husi Ministeriu Edukasaun (ME) koloka ona ba eskola sira iha Munisipiu Ainaro, sira halao servisu hanesan baibain, tanba sira hatene halao sira nian knaar ho diak.
Diretor Servisu Edukasaun Munisipiu Ainaro, Patricio da Costa Magno hatoo lia hirak nee ba STL liu husi via telefone, Domingu nee (20/04/2025).
“Foin daudaun Kolokasaun bolsa kandidatu nee ami husi Ainaro hetan nain tolu,. nee ami koloka ona ba ita nian Ensinu Pre Eskolar sira, ida ami koloka ba iha pre eskolar ida iha Maubesi Vila, ida seluk koloka ba iha pre eskolar ida iha Hatubiliko. Ami hetan profesores nain tolu, mane rua feto ida. Ita nian profesores neebe mak antes nee ME koloka ona mai iha Ainaro, nee sira halao servisu hanesan baibain, nee duni sira halao knaar ho diak,” nia dehan.
Nia dehan, kona-ba profesores nain hira mak aluga komunidade ninia uma, dadus ida nee seidauk bele fo, tanba presiza husu lai informasaun, katak hira mak aluga komunidade nian uma no hira mak komunidade oferese fatin ba sira, nee duni presiza husu lai dadus lo-loos, hafoin bele fo sai.
“Dadus kona-ba ita nian profesores aluga uma nee, hau seidauk bele fo informasaun ba ita boot sira, tanba hau tenke husu no hetan dadus neebe los, hafoin bele fo informasaun, tanba iha duni profesores balun aluga komunidade nian uma,” nia afirma.
Iha parte seluk, Diretor Servisu Edukasaun Munisipiu Manatuto, Patricio da Cruz Quintao dehan, profesores sira neebe koloka mai iha Manatuto, liu-liu koloka ba eskola sira nee, profesor idak-idak hanorin tuir orariu neebe mak estabelese ona, nee duni sira hatene ona sira nian oras hanorin.
“Ita nian profesores sira neebe koloka ba eskola sira nee, sira idak-idak halao knaar tuir orariu neebe eskola idak-idak estabelese ona, oinsa sira bele kumpri oras tama no sai ninia, inklui kumpri orariu hanorin neebe iha ona,” nia esplika.
(jac)
