DILI, STLTIMORLESTE.com – Oras nee daudaun profesores husi Eskola Tekniku Vokasional (Tekvo) 28 de Novembru Bekora nain 3 moras no ida seluk tama kategoria ba idade reforma.
Tuir Diretor Eskola Tekniku Vokasional 28 de Novembru Bekora, Tomas Pinto dehan, maske sira husu ona iha edukasaun nivel nasional, maibe too agora seidauk iha resposta, nee duni iha eskola ida nee profesor nain ida kategoria reforma, nain 3 moras, ida ba eskola, husi nain 3 moras nee ida kuaze moras tinan 14, ida tinan 3 ona, ida tinan 4, ida fali mak moras foin fulan 3 liu ba.
“Ami nian profesores nain 1 mak tama iha idade reforma, dala ruma iha tinan ida nee ou tinan oin, maibe tanba ami seidauk iha profesor ba disiplina português, ami labele fo sai, tanba nia sei bele hanorin, sei forsa hela, maske profesor nee husu atu reforma ona, maibe ami mak sei tahan hela nia,” dehan Tomas ba jornalista STL iha nia knaar fatin Bekora, Kuarta nee (07/05/2025).
Iha parte seluk, Diretor Nasional Rekursu Umanus Ministeriu Edukasaun, João Amaral hatete, dadus profesor reforma neebe ohin mensiona nee bele aumenta, tanba husi parte rekursu umanu sei kontinua simu dadus profesores reforma ninia.
“Ita sei loke tan rekrutamentu tuir vagatura neebe mensiona, tanba komesa fulan Janeiru 2026 obrigatoriu tenke lao, sira neebe mak iha bolsa nee koloka seidauk too, entaun Ministeriu Edukasaun tenke rekruta tuir vagatura no tuir pensaun obrigatoriu, tanba tuir Ministeriu Edukasaun nian nee iha mil ou besik dois mil neebe sei reforma iha 2026, nee obrigatoriu ho idade 65 tuir lei neebe mak vigora,” dehan nia.
Iha parte seluk, Diretor EBC Manleuana, Carlos Correia hatete, agora daudaun profesores nain 3 ou 4 mak tama ba idade reforma, tanba profesor balun idede 70 resin ona, sira nee hanesan profesor da turma.
“Ami nian profesor reforma nee seidauk hatama karta rekerimentu no sira hein deit despaisu husi Komisaun Funsaun Publika, tanba nee karta rekerimentu sira la hatama ida, tanba ida nee depende ba sira husi nasional,” nia esplika.
(jen)
