DILI, STLTIMORLESTE.com – Profesores husi Eskola Ensinu Baziku Sentral (EBC – sigla português) 10 Dezembru Komoro, bainhira husu lisensa tenke iha karta.
“Regulamentu interna nee ba profesor sira, nee ita bazeia ba lei funsaun publika, se regulamentu interna bazeia ba lei funsaun publika, profesores tenke iha 25 oras por semana, profesores sira tenke hamriik iha estudantes sira nian oin, loron Sabadu nee ba atividades extra kurikular, entaun dias efetivas ba profesor sira neebe halo hela servisu iha eskola ida nee hahu husi Segunda too Sabadu,” informa Direitor EBC 10 Dezembru Komoro, Calistro A. Guterres ba STL iha nia knaar fatin Komoro, Tersa nee (08/04/2025).
Nia akresenta, prosesu ensinu 24 tempu bazeia ba kurikulu, tanba kurikulu dala barak materia português, inglês no tetum nee oras la hanesan ho materia siensia sosiais, materia siensia fizika naturais oras la hanesan ho materia sosiais, profesores hotu kumpri regulamentu molok tama hanorin estudantes iha sala laran, profesor sira aprezenta planu de aula.
“Bazeia ba planu de aula nee mak profesor sira bele hanorin estudantes, tanba kontiudu neebe sira atu hanorin estudantes nee tenke mai husi planu de aula, ida nee mak regulamentu,.bainhira sira lisensa la mai tenke iha karta lisensa neebe arkivadu, nunee ita bele kontrola professor sira la liu husi vervalmente, maibe tenke iha karta,” nia esplika.
Nunee mos Diretor EBC Manleuana, Carlos Correia hatete, eskola iha regulamentu hodi kontrola profesor sira no profesores sira kada loron halo planu de aula, tanba nee hanorin bazeia ba planu neebe iha.
“Bainhira ita nian profesor sira iha atividades ruma, nee sira husu lisensa, maibe durante nee ami nian profesor sira sempre kumpri regras tama no sai, nunee mos ita nian profesor sira tenke halo planu aula,” nia informa.
Carlos afirma, regras nee ba profesor no estudantes sira neebe mak falta no mai tarde, maibe asuntu kona-ba kontrolu nee kompetensia adjuntu ninia, nuudar Diretor halo kontrolu injeral deit iha eskola.
(jac)
