DILI, STLTIMORLESTE.com – Nuudar profesores kada loron tenke kumpri orariu hanorin, tanba nee dader tama tuku 8:00 no sai tuku 12:30.
Lia hirak nee hatoo husi Feliciano Gusmao hanesan Profesor husi Ensinu Baziku Sentral (EBC – sigla português) Fatumeta ba jornalista STL Kuarta nee (28/05/2025).
“Ami kumpri tuir orariu neebe estabelese ona iha ami nian eskola. Ami hotu-hotu tuir regra neebe iha. Dader ami tama tuku 8.00 no sai 12.30, ita nuudar profesor tenke kumpri orariu neebe mak iha ona, oinsa dader tama sai oras, no meudia sai tuir duni oras. Ami hotu kumpri orariu neebe mak iha ona,” dehan nia.
Feliciano hatutan, nuudar edukador presiza tama no sai tuir oras, tanba estudantes sira dader tama eskola nee profesor kada materia mak hanorin tuir idak-idak nian orariu neebe estabelese ona, nee duni idak-idak hatene ninia orariu, ho nunee prosesu aprendizajen lao ho diak, tanba profesores sira kumpri orariu.
Iha parte seluk, Diretor EBC Manleuana, Carlos Correia dehan, profesores sira sempre kumpri oras hanorin nian, tama eskola iha nian regras ida para bele halo kontrolu ba profesores sira, nee adjuntu ninia servisu ida hodi haree ba asuntu ida nee.
“Hau haree ba enjeral deit, kona-ba halo kontrolu ba profesores sira nee adjuntu mak halo, maibe profesor sira kumpri oras hanorin nian, tanba nee ami nian profesores idak-idak tama tuir oras, ho nunee bele hahu aprendizajen ba ami nian estudantes sira iha sala laran, depois sira halo planu de aula,” nia esplika.
Carlos akresenta, nuudar edukador sempre tama tuir oras, liu-liu kumpri orariu hanorin nee importante, maibe durante nee profesores husi eskola ida nee sempre halo tuir regras neebe mak iha ona.
(jac)
