DILI, STLTIMORLESTE.com – Profesores neebe mak Ministeriu Edukasaun koloka ona ba eskola sira iha Munisipiu Likisa la kestiona kona-ba sira nia hela fatin neebe sira hela ba.
Lia hirak nee hatoo husi Diretor Servisu Edukasaun Munisipiu Likisa, Julio da Silva ba STL liu husi telefone, Kinta nee (19/12/2024).
“Tuir orientasaun nee sira aluga uma, maibe agora depende sira koalia iha neeba, tanba maioria nee sira hetan hotu fatin, maibe sira seidauk informa katak fatin nee aluga ka balun oferese deit ba iha profesor balu nia uma, kona-ba aluga uma nee hau seidauk hetan informasaun, hira mak hela iha uma no hira mak aluga, maibe enjeral nee sira iha hotu fatin, tanba sira la kestiona kona-ba fatin, katak fatin nee iha ka lae,” nia esplika.
Julio hatutan, too agora profesores sira nonok hela, espera katak buat hotu lao diak liu-liu kona-ba sira nian fatin neebe mak daudaun nee sira hela ba, hodi bele halao sira nian atividades ensinu no aprendizajen ba estudantes.
Nunee mos Diretor Edukasaun Munisipiu Manatuto, Patricio da Cruz Quintao dehan, kolokasaun sira nee mak agora fatin propriu neebe mak laiha, hanesan rezidensia ba profesor nee mak laiha, nee duni balun aluga deit mak komunidade sira nian uma.
(jac)
