DILI, STLTIMORLESTE.com – Durante nee profesores sira husi Eskola Baziku Sentral (EBC – sigla português) Manleuana sempre kumpri regras neebe mak estabelese ona, maibe bainhira la kumpri regras mak sei simu karta xamada.
Lia hirak nee hatoo husi Diretor Ensinu baziku Sentral Manleuana, Carlos Correia ba STL, Kuarta nee (13/11/2024).
“Ami iha regras neebe mak atu kontrola ita nian profesor sira, agora ita nian profesor sira neebe mak mai tarde nee ita sei bolu sira para fo xamada atensaun ba sira, maibe ita nian profesor neebe mai tarde nee, dala ruma hanorin oras segundu ninia, tanba oras primeiru nee sura mai sedu eskola, tanba ami troka oras nee, hau halo kontrola jeral deit, neebe ita nian profesor sira hotu kumpri regras ida nee,” dehan nia.
Bainhira profesor sira la kumpri regras, Carlos dehan, ida nee sei halo xamada ba sira, depois simu karta xamada husi Edukasaun Munisipal, tanba nee profesor sira nafatin kumpri regras neebe mak iha ona.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, eskola publiku, privadu no katolika nee iha ninia regras ba estudante no profesor sira, eskola nobel hanesan eskola privadu ida neebe mak iha ninia regras ba profesor sira tama hanorin tuir oras neebe iha ona, karik iha preokupasaun ruma tenke fo hatene ba eskola.
(jac)
