DILI, STLTIMORLESTE.com – Ministeriu Edukasaun (ME) kestiona profesores sira rasik ladun jere didiak livru sira iha fatin ou iha biblioteka.
Lia hirak nee hatoo husi Ministra Edukasaun (ME), Dulce de Jesus Soares ba jornalista sira, Sesta nee (03/10/2025).
“Ita boot sira akompanha, dala barak iha eskola hau sempre hirus oituan, tanba profesor sira sempre fo razaun katak, estudantes sira estraga livru, tanba dehan estudantes sira la kuidadu livru, entaun livru hirak nee sai nakles hotu kedas. Defaktu iha eskola barak mak hau ba, livrus sira nee laos problema ho estudantes, maibe profesor sira rasik mos ladun jere livru iha fatin neebe sira dehan, biblioteka ida nee sai ona asuntu ida ba ME. Ami liu husi Diretor Nasional no Munisipal, mentor, inspetor, ami buka kurizi malu hadia daudaun ona,” tenik nia.
Nia dehan, dala ruma nia sempre ho lian makaas oituan, maibe hakarak deit katak, profesor sira hotu pelumenus iha sira nian responsabilidade, atu nunee halao sira nia knaar ho diak liu tan. Nee duni oinsa mak eskola idak-idak atu jere livru nee ho diak, atu nunee estudantes sira bele asesu ba livrus hirak nee.
Jornalista: Jacinta Sequeira
Editora: Domingas Gomes
