DILI, STLTIMORLESTE.com – Bainhira profesores neebe mak moras no iha asuntu importante ruma, nee sira tenke fo informasaun ba parte eskola.
Koordenador Pre Eskolar Sagrada Familia Vila Verde, Cornelio Antonio Soares hatoo lia hirak nee ba STL, Domingu (09/02/2025).
“Hau nuudar koordenador iha pre eskolar ida nee, hau nafatin halo koordenasaun neebe mak diak ho hau nian profesores sira, kuandu sira moras ka iha asuntu importante ruma, nee sira sempre fo hatene mai eskola, atu nunee ami bele hatene, no ami nian profesores sira kada loron mai hanorin tuir oras neebe iha orariu, tanba nuudar funsionariu publiku tama no sai servisu tenke kumpri oras,” dehan nia.
Cornelio hatete, koordenasaun servisu nee importante tebes, no ema idak-idak tama servisu no sai nee presiza tuir regras neebe iha, loron-loron mai hanorin estudantes sira tuir orariu neebe mak iha, tanba nee profesor sira iha nee kumpri oras nafatin, fo hanoin ba sira atu nunee kada loron halao aprendizajen ba estudantes sira.
Iha fatin seluk, Diretor EBC Manleuana, Carlos Correia hatete, kona-ba halo kontrolu ba profesores sira nee adjuntu ninia servisu, maibe nuudar diretor halo kontrolu jeral deit, tanba profesores idak-idak mai hanorin kumpri oras, tanba sira idak-idak iha responsabilidade ba sira nian orariu hanorin.
“Kona-ba halo kontrolu ba ita nia profesores sira nee adjuntu ninia servisu, maibe nuudar diretor halo kontrolu jeral deit, tanba profesores idak-idak mai hanorin kumpri oras, tanba sira idak-idak iha responsabilidade ba sira nian orariu hanorin,” nia esplika.
(jac)
