BAUKAU, STLTIMORLESTE.com – Profesores hamutuk nain 207 iha Munisipiu Baukau deskansa ona iha uma, tanba reformadu obrigatoriu.
Informasaun nee hatoo husi Diretor Servisu Munisipal Edukasaun Baukau, Afonso dos Santos da Costa ba STL iha ninia knaar fatin Vila Nova Baukau, Segunda (12/01/2026).
“Tinan ida nee reforma obrigatoriu hamutuk 207 nee hahu husi eskola baziku, sekundariu tekniku vokasional. Sira para ona komesa iha dia 31 Dezembru 2025,” nia dehan.
Nia katak, profesores reformado obrigatoriu hamutuk nain 207, tanba atinji ona idade 66 nunee remata ona servisu iha loron 31 Dezembru 2025 no iha inisiu prosesu aprendizajem anu letivu 2026 profesores hirak nee la ativu ona hanesan profesores baibain.
Afonso akresenta, husi profesores 207 tama ba reformadu obrigatoriu sei afeta ba menus profesores nivel eskola sira iha Munisipiu Baukau, maibe Ministeriu Edukasaun sei koloka hikas profesores bolsa kandidatu neebe sei iha faze kolokasaun hodi substitui profesores reformadu sira.
“Nee afeta ba menus profesores maibe ami iha kontaktu ona informasaun tempu badak sira sei halo kolokasaun ba substituisaun nee. Ita nia lori nian hira ida nee mak sei mai fila fali, ezemplu ita iha 207 entaun ita nia mai nee 207,” Afonso argumentu.
Diretor Servisu Munisipal Edukasaun Baukau nee katak, kolokasaun profesores bolsa kandidatu neebe atu subtitui profesores reformadu obrigatoriu, parte Servisu Edukasaun Baukau seidauk hatene loron kolokasaun, maibe sei koloka hikas profesores bolsa kandidatu nain 207 hodi subtitui hikas profesores reformadu obrigatoriu nain 207 neebe termina ona servisu iha loron 31 Dezembru 2025.
(tom)
