DILI, STLTIMORLESTE.com – Profesores nain 6 husi Ensinu Baziku Filial (EBF) nu. 5 Komoro ho kondisaun moras, la tama hanorin estudante sira.
Asuntu nee hatoo husi Koordenador EBF nu. 5 Komoro, Marcelino Moniz de Araujo ba STL iha nia knaar fatin Komoro, Sesta nee (21/03/2025).
“Kona-ba profesor, agora daudaun bolsa kandidatu nee ami hetan tan nain 10, nee hau bele dehan katak sufisiente ona, tanba foin daudaun hetan tan profesores husi bolsa kandidatu sira nee nain sanolu, tanba ita nian profesor nain 6 mak moras, ida mak foin mate iha semana rua liu ba, tanba nee sira mai troka iha sira nia fatin, ami nian profesores neebe mak moras nee mos balu too agora seidauk tama hanorin,” nia esplika.
Nia dehan, agora daudaun sira nian total profesores neebe mak hanorin estudante iha eskola refere hamutuk 55, nee inklui ona ho koordenador, tanba nee kona-ba profesor hanorin laiha problema ona.
“Iha ami nian eskola laiha problema ona ba profesores, tanba iha kolokasaun ba kandidatu profesores nee ami hetan nain 10, nee duni ba ami nee sufisiente ona atu bele hanorin ami nia estudante sira,” katak nia.
Iha parte seluk, Koordenador Pre Eskolar Aagrada Familia Vila Verde, Cornelio Antonio Soares dehan, profesores nain 3 no ida seluk mak moras beibeik, maibe ativu hanorin estudante sira.
“Ami nian profesores hamutuk nain 3 ho hau nain 4, maibe ida mak moras hela deit, maibe tama hanorin estudante sira,” nia haktuir.
(jac)
