DILI, STLTIMORLESTE.com – Kada tinan profesores neebe hanorin iha ensinu sekundariu, sira sempre partisipa iha formasaun husi INFORDEPE.
Diretor Nasional Ensinu Sekundariu iha ME, Benjamin Gomes da Cruz Fernandes hatete, durante nee profesores sira neebe hanorin iha nivel sekundariu nee sira hetan formasaun kada tinan husi INFORDEPE.
“Hau hanoin kada tinan nee ita nian profesores sira partisipa formasaun kona-ba lingua português, nee husi INFORDEPE mak fo ba sira, dadus kompletu nee ita boot sira bele foti iha INFORDEPE, tanba sira mak rai dadus nee,” dehan Benjamin ba STL, Kinta nee (12/02/2026).
Nia dehan, nee duni liu husi formasaun lian português neebe profesor sira tuir, iha progresu neebe diak, hodi nunee sira bele uza lingua nee ba iha prosesu ensinu aprendizajen ba estudantes sira, tanba formasaun nee importante tebes hodi bele aumenta konhesimentu profesores sira.
Nunee mos Diretor Eskola Sekundariu Jeral 10 de Dezembru Comoro, Manuel Verdial dehan, formasaun lian português ba profesores sira nee importante tebes, tanba nee Ministériu relevante nafatin fo formasaun ba profesores sira.
“Hau hanoin formasaun lian português ba ita nian profesores sira nee importante tebes, tanba nee Ministériu relevante nafatin fo formasaun ba profesores sira, ho nunee ita nian profesores sira iha konhesimentu diak liu tan ba lian ida nee,” nia esplika.
Entretantu bainhira STL tenta atu konfirma asuntu formasaun nee ba Prezidente INFORDEPE, Domingos Martins, maibe laiha resposta.
(jac)
