DILI, STLTIMORLESTE.com – Kada loron profesores husi eskola Hotelaria no Turizmu Bekora submete sira nian planu de aula.
Diretor Eskola Hotelaria no Turizmu Bekora, Charles F. Guterres dehan, profesor sira tenke submete sira nian planu de aula hotu mai iha kurrikulu, depois mak sira bele foin hanorin, nee obrigatoriu, tanba nee bele dehan katak sai knaar profesor sira nian mak ida nee, se la halo planu de aula, depois hanorin oinsa, planu aula nee sai hanesan mata dalan ida, bainhira hanorin tuir sekuensia.
“Eskola agora daudaun nee ita iha regras sira, ita bolu dehan regras hanorin diarea, ita iha lista prezensa ida oras primeiru se mak hanorin ita tenke tama sai aula,l para profesor asina, ida nee katak ita kontrola loron-loron, nee ita kontrola hahu iha loron Segunda too iha loron Sesta, nee ita iha, tanba ita kontrola liu husi lista prezensa nomos ita bele haruka adjuntu para bele tau matan ba profesor foun sira nee,” dehan Direitor Eskola Hotelaria no Turizmu Bekora, Charles F. Guterres ba STL iha nia knaar fatin Bekora, Tersa (06./05/2025).
Nia dehan, oinsa tau matan nafatin ba profesor foun sira nee para bele sai hanesan mentor, hodi haree profesor nee hanorin ninia metodu diak ona ka lae, nunee bele hetan dadus husi nee. Profesor sira sempre halo planu aula.
“Ninia asaun nee tenke tuir planu aula nee, se karik profesor ida mak la halo planu de aula nee laos profesor ona, tanba nee hanorin ita nian estudantes sira tuir planu de aula neebe mak ita nian profesor sira prepara ona,” katak nia.
Iha fatin seluk, Diretor Eskola Sekundariu Nobel da Paz, Jeremias P. de Jesus dehan, kada loron hanorin estudantes nee bazeia ba planu de aula neebe profesor sira prepara, nee loron-loron tenke halo planu de aula.
Nunee mos Diretor Ensinu Sekundariu Jeral nu. 4 de Setembru Balide, Sergio A. da Cruz hatete, profesor sira nafatin halo planu de aula, tanba hanorin estudantes sira tuir planu aula neebe profesores prepara ona, nunee mos eskola nafatin kontrola ninia profesor.
(jac)
