DILI, STLTIMORLESTE.com – Lingua Ingles hanesan lingua international ba ema hotu atu aprende, tanba nee husu ba manorin nain sira atu aprende lingua nee ho diak.
“Ita hatene katak lingua ingles nee sai lingua importante iha mundu, no ema hotu-hotu bele aprende lingua refere hodi halo komunikasaun ba malu, liu-liu koalia iha fatin aprende ka eskola sira, sai hanesan lingua diaria,” dehan akademiku husi Universidade Nasional Timor Lorosa’e (UNTL), areal Lingua Ingles, Noel de Asuncão ba STL ,iha Liceu, Dili, Segunda (04/11/2024).
Lingua Ingles tuir nia katak, ema hotu hakarak aprende, tanba mundu global ohin loron, teknolojikamente tenki uza lingua Ingles, nee sai hanesan pontu importante ida ba profesor ka manorin nain hotu-hotu iha TL atu aprende lingua nee ho diak.
Tanba sistema eletroniku hotu, liu-liu administrasaun iha TL, liga ba sistema Governu eletroniku, hotu-hotu uza lingua ingles, nunee hanesan manorin nain ida tenki hatene koalia língua ingles, nunee bele hanorin fali ba estudante ida atu hatene, no bele hanorin fali ba estudante ida seluk.
Iha parte seluk, Pontu Fokal ASEAN, SEAMEO RELC, husi Ministeriu Edukasaun (ME), Paulo Henrique Ribeiro afirma, lingua Ingles nee importante tebes ba ema manorin nain sira, tanba nee rekomenda ba sira hodi aprende lingua nee ho diak, tanba ingles nee nuudar lingua international ba ema hotu,
Tanba nasaun barak iha nia lingua ofisial rasik, maibe hakarak aprende lingua Ingles, tanba lingua refere nee importante tebes, nuudar lingua international ba ema hotu, bainhira hatene ona mak sei fasil ba ema hotu, liu-liu manorin nain atu trasforma mentalidade sosiedade nian sai ba dalan loos.
Entretantu Akademiku husi Universidade Dili (UNDIL), area Relasaun Internasional, Martino Soares katak, lingua Ingles sai lingua neebe uza hodi konhese mundu, tanba nee enkoraza ba Timoroan hotu atu aprende lingua Ingles hanesan mos lingua ofisial, komersial iha Timor Leste.
(EST/1)
