BAUKAU, STLTIMORLESTE.com – Profesores voluntariu nain 2 lori tinan 2 hanorin labarik idade 4 hamutuk nain 33, konsege nain 7 gradua iha Pre-eskolar Publiku, Dom Carlos Filipe Ximenes Belo Afaça, Postu Administrativu Kelikai Antigu, Munisipiu Baukau.
“Ami kontente tebes, tanba eskola nee lao iha 2023, maibe foin primeira vez halao graduasaun ba estudante 7 husi estudante nain 33 ho profesores neebe durante nee hanorin sira sein vensimentu,” hateten reprezentante Koordenador Pre-eskolar Afaça, Carlos Filipe Ximenes liu husi diskursu, iha serimonia graduasaun, Segunda nee (16/12/2024).
Maibe nia dehan, husi numeru estudante 33 neebe durante tuir prosesu aprendizajen iha pre-eskolar refere nain 7 hakat uluk ba faze graduasaun dahuluk nian, tanba hatene ona hakerek, lee no sura, aleinde mos idade too ona 6 neebe bele aprende diak liu tan iha ensinu primeiru siklu ba anu letivu 2025 nian.
Enkauntu restu seluk neebe seidauk bele hakat ba faze graduasaun, tanba kestaun idade menus husi tinan 5 neebe seidauk konhese letra no numeru ho diak hodi lee no sura.
Maibe manorin sira sei esforsu hodi kapasita estudante aujente ba graduasaun refere, nunee anu letivu 2025 bele partisipa iha graduasaun.
Tanba dezafiu neebe estudante sira hamutuk ho nia profesores voluntariu nain 2 iha pre-eskolar enfrenta mak sala aprendizajen propoiu no meza kadeira laiha, nunee durante prosesu aprendizajen lao, utiliza Sede Suku ba fatin aprendizajen nian no meza kadeira kontribui husi komunidade hodi fasilita estudante sira nia prosesu aprendizajen too ohin loron.
Nunee mos livru manual propriu pre-eskolar nian atu fasilita labarik estudante sira durante nee laiha, maibe profesores voluntariu sira mantein ho vokasaun lori estudante nain 7 gradua iha pre-eskolar refere.
Enkuantu, reprezentante inan aman husi graduante, Armando de Castro agradese ba profesores voluntariu neebe sakrifika tempu hodi hanorin labarik sira bele konhese ona letra no numeru atu kontinua aprende iha primeiru siklu.
Nunee mos Inspekor Pre-Eskolar Servisu Edukasun Munisipiu Baukau, Acacio Ximenes hatete, graduasaun ba estudante pre-eskolar sira bazeia ba sirkular nu. 184/2015 husi diresaun nasional edukasun pre-eskolar.
Entretantu total pre-eskolar iha Munisipiu Baukau rasik daudaun nee hamutuk 41.
(EST 2)
