DILI, STLTIMORLESTE.com – Profesores husi Ensinu Baziku Filial (EBF) Vila Verde hamutuk nain 7 sei tama idade reforma iha tinan oin.
Lia hirak nee hatoo husi Koordenadora EBF Vila Verde, Filomena Casmira ba jornalista STL iha nia knaar fatin Vila Verde, Tersa nee (24/06/2025).
“Dadus reforma neebe daudaun nee iha, ita nian profesores nain 7, balun hatama ona Karta reforma no balun seidauk, maibe husi parte edukasaun nian hatene ona katak profesores sira nee sei tama reforma iha tinan oin, tanba dadus reforma nian nee husi eskola hotu-hotu, inklui husi eskola nee hatama hotu ona dadus reforma ba ministeriu,” nia komenta.
Nia hatutan, nee duni profesores nain 7 nee sei tama reforma iha tinan oin, sira nee maioria ho idade 70 ba leten, sira hanorin iha sestu ano ho quinto ano, tanba nee dadus hatama ona, hein tinan oin tama reforma.
Iha fatin seluk, Diretor Nasional Rekursu Umanu iha MinisteriuEdukasaun, João Amaral dehan, Ministeriu Edukasaun (ME) tinan oin sei halo reforma obrigatoriu ba profesores hamutuk 1.456.
“1.456 nee mak sei tama reforma obrigatoriu iha fulan Janeiru 2026, nee tuir dadus neebe mak ami simu, maibe agora daudaun iha hela verifikasaun por munisipiu, atu nunee ita bele identifika munisipiu ida nee ninia pre eskolar hira mak profesor tama ona ba reforma obrigatoriu, ensinu baziku, sekundariu no tekvo ninia profesores hira mak tama iha reforma obrigatoriu,” katak nia.
João dehan, agora daudaun iha faze verifikasaun ba profesores reforma obrigatoriu iha kada munisipiu, nee duni numeru neebe ohin mensiona nee tuir lei Komisaun Funsaun Publiku nian hahu halao reforma obrigatoriu iha fulan Janeiru 2026.
“Ita verifika iha kada eskola hahu husi nivel pre eskolar, ensinu baziku, sekundariu jeral no tekniku vokasional, para nunee ita bele hatene eskola ida neebe mak ninia profesores tama iha reforma obrigatoriu,” nia komenta.
(jac)
