DILI, STLTIMORLESTE.com – Mediku Espesialista Ortpedia iha Hospital Nasionál Guido Valadares (HNGV), Nilton do Carmo da Silva hatete, too agora sira rasik seidauk simu karta sirkular neebe mak Ministeriu Saude (MS) hasai iha loron 29 Outubru, hodi bandu mediku sira labele halo servisu dupla iha klinika privada sira.
“Hanesan funsionariu publiku ba instituisaun HNGV seidauk hetan karta formal, tantu husi MS nomos HNGV, ho razaun akumulasaun no servisu dupla, too agora ami seidauk simu karta nee,” hatete Nilton do Carmo da Silva ba STL iha nia knaar fatin HNGV Bidau, Kuarta (18/12/2024).
Nia dehan, karta nee husi MS fo sai sirkular duni iha media sosial, kona-ba labele halo servisu iha klinika privada, tanba ho razaun akumulasaun nomos servisu dupla.
“Karta sai nee ami akompanha husi media no haree katak, husi parte MS sirkula duni iha instituisaun privada sira no ami mos akompanha iha media katak husi MS mensiona katak, ho razaun akumulasaun nomos dupla. Entaun hau atu fo fali liafuan ida katak, sei ita temi kona-ba akumulasaun nee ita haree ba iha definisaun kontiudu husi akumulasaun, nee katak atividade neebe mak tuir tempu terminadu labele servisu hanesan ka ema dehan dupla funsaun husi 8 oras too 17:30, labele dupla funsaun. Entaun hau husu fila fali ba sira neebe mak hasai karta sirkular sira dehan dupla funsaun, depois hau fila ba uma halao hau nia knaar hanesan xefe da familia nee hau dupla funsaun ka lae, entaun ida nee mak ami hakarak hatoo katak too agora ami seidauk simu karta,” nia esplika.
Nia informa, karta neebe MS hasai nee hanesan funsionariu funsaun publiku la simu kopia ruma husi karta sirkular nee, konsidera hoax.
Iha sorin seluk, Eis Ministru Saude, Nelson Martins hateten, relasiona ho karta sirkular neebe MS hasai kona-ba mediku sira servisu dupla mak husi parte Asosiasaun Mediku Timor Leste nomos MS atu bolu malu halo dialogu, nunee bele fo sosulasaun diak, hodi fo benifisiu ba pasiente sira.
“Hau koalia nee hanesan kapasidade Eis Ministru Saude, entaun hanesan Membru Asosiasaun Mediku neebe lee kona sirkular MS hasai nee, hau hanoin parte rua nee iha razaun hotu, agora razaun importante mak oinsa atu fo benifisiu ba ita nia pasiente sira, entaun MS hasai sirkular nee atu mediku sira foka liu ba kualidade asistensia labele konflitu interese. Agora razaun husi Asosiasaun Mediku sira, tanba sira funsionariu tuir lei kontratu servisu oras 8, banhira oras 8 servisu hotu tiha nia bele halo servisu saida deit, hanesan nia ba lori karreta halo toos, natar no bele mos halo servisu seluk ba hanorin ba pratika iha Klinika nee direitu ema ida nian. Entaun dalan diak ba sira mak tenke halo dialogu nunee fo atendimentu diak ba pasiente sira,” nia esplika.
Nia deklara, forsa ho forsa sei la rezolve buat ida, entaun problema sira nee pasiente mak sei hasoru, entaun Asosiasaun hakerek ona karta atu halo dialogu hanoin bele halo diskusaun diak nunee lori saude ba oin.
(jen)
