DILI, STLTIMORLESTE.com – Programa Xefe Suku Eleitu Bidau Santa-Ana, Postu Administrativu Cristo-Rei, Munisipiu Dili, neebe atinji ona mak halo reabilitasaun ba Sede Suku, bazeia ba servisu hamutuk ho estrutura suku.
Xefe Suku Bidau Santa-Ana, Alexandrino Mesquita da C. Braz informa ba STL iha Sede Suku Bidau Santa-Ana, Kinta (29/1/2026).
Tuir Alexandrino, nuudar autoridade suku ida wainhira povu fo fiar ona tenke iha nia programa servisu neebe klaru hodi servi no hanae povu. Nee duni, bazeia ba planu refere maka depoisde eleitu sai Xefe Suku Bidaun Santa-Ana ba periodu 2023 too 2030, programa primeiru halo reabilitasaun ba sede suku, ho rasaun kondisaun sede suku aat tempu udan bee sempre tama sede laran hodi difikulta atividade servisu inklui estraga dokumentus balu tanba nee tau iha prioridade konsege hadia duni. Halo mos moru hodi asegura areador sede suku tanba dalaruma labarik sira tama-sai inklui nahe kaber rai. Atu nunee, hanesan edifisiu ida hodi bele atende komunidade sira mai trata dokumetu ruma ho seguru no saudavel. Tanba fatin sede suku ninia atendimentu kada loron komunidade sempre mai trata dokumentu.
Aleinde ida nee katak, Alexandrino, planu seluk poka ba komunidade liu-liu ba fatin sira neebe ita observa katak presiza ajuda no tulun governu hodi husu ba ministeriu relevante tanba nee Suku Bidau Santa-Ana iha aldeia 4, iha aldeia rua kuanse tinan-tinan vitima ba inundasaun liu-liu husi Aldeia Sagrada Familia ho Aldeia Manumata, aldeia rua nee kondisaun jeorafia besik foho lolon. Tan nee, iha tempu udan no anin boot rezulta ai-tohar, udan boot bee tun husi foho mai makas valeta sira neebe iha labele akumula bee tanba valeta kiik bee tama fali komunidade nia uma.
“Ami haree ho situasaun sira nee, ami buka esforsu hodi responde liu husi Programa Nasional Dezenvolvimentu Suku (PNDS) konsege responde ona iha fatin 5 husi aldeia rua nee, halo bee dalan hodi kanaliza bee halai tuir dalan sai ba mota,”katak Alexandrino.
Autoridade Suku nee fundamenta, Suku Bidaun Santa-Ana kombre aldeia 4, kompostu husi Aldeia Toko Baru, Aldeia Mota-Klaran, Aldeia Sagrada Familia ho Aldeia Manumata. Husi aldeia 4 nee aldeia rua seluk hanesan Aldeia Toko Baru ho Aldeia Mota- Klaran tanba kondisaun jeografia iha rai tetetuk neebe iha buat balun maka hadia.
Nia fundamenta ida nee mak programa neebe atinji ona durante nia mandatu agora dadaun tama ona ba tinan 2, hahu husi dia 28 Novembru 2023 too mai ate agora tama tinan 2026, foin halo tinan rua liu fulan ida, buat barak mak halo ona servisu hamutuk ho estrutura suku konsege halo, primeiru salva uluk sede suku tanba fatin nee hanesan fatin edifisiu ida oinsa kria fatin ida neebe dignu atu bele akumula komunidade sira mai trata dokuentus. Maibe iha buat balun mos sei presiza nafatin ba iha futuru.
Aleinde nee tuir observasaun STL ho programa neebe dezenvolve liu husi PNDS bee-dalan neebe iha komunidade nia leet parte balun konsege hadia duni, tanba nee bee neebe sulin iha bairru laran liu-liu komunidade nia leet suli tuir valeta sai ba tama too mota laran, tanba suku refere besik mota Bidau Mota Bidau Mota-Klaran sai ba mosu Ponte BJ. Habibie. Maske nunee husi fatin balu valeta sei haree hetan foer intupidu iha laran, liu-liu valeta neebe asegura Estrada dirasaun husi mota ninin parte Aldeia Mota-Klaran maibe ladun.
(ger)
