BAUKAU, STLTIMORLESTE.com – Implementasaun programa merenda eskolar iha eskola Ensinu Baziku Filial (EBF) Primeiru, Segundu no Terseiru Siklu Buruma, Postu Administrativu Baukau Vila, Munisipiu Baukau paradu.
Koordendor Eskola Ensinu Baziku Filial Primeiru, Segundu no Terseiru Siklu Buruma, Henrique Freitas da Costa esplika, implementaus programa merenda eskolar iha Munisipiu Baukau ofisialmente lansa ona iha loron 20 Janeiru 2026, nunee eskola sira iha Munisipiu Baukau inklui eskola EBF Buruma implementa ona programa refere, maibe daudaun paradu, tanba seidauk iha orsamentu hodi kontinua programa refere.
“Merenda eskolar iha eskola EBF Buruma lao iha dia 20 Janeiru hotu iha dia 26 Janeiru orsamentu nee ba loron 5 deit nee mak agora paradu tiha ona ami hein deit bainhira mak kontinua seidauk iha informasaun,” Henrique hateten ba STL iha EBF Buruma, Kuarta (28/01/2026)
Nia sublina, implementasaun programa merenda eskolar neebe iha eskola EBF Buruma fo han estudante sira husi orsamentu restu tinan 2025 nian nunee implementa deit semana ida, tanba hahu husi loron 20-26 Janeiru, maibe seidauk iha kontinuasaun.
Nia komenta, programa refere atu kontinua ou lae parte eskola seidauk hetan informasaun husi Servisu Munisipal Edukasaun Baukau.
Liga asuntu nee STL tenta komfirma Diretor Servisu Munisipal Edukasaun Baukau iha nia knaar fatin, maibe laiha atu fo komentariu, tanba partisipa hela atividade importante iha Munisipal.
Entretantu total estudante iha eskola EBF Buruma neebe benefisiariu ba programa refere hamutuk 517 kompostu pre-eskolar, primeiru, segundu no terseiru siklu.
(tom)
