DILI, STLTIMORLESTE.com – Too agora implementasaun programa merenda eskolar iha RAEOA seidauk lao, tanba relatóriu husi eskola balun seidauk kompleta, tanba nee seidauk transfere osan ba konta bankaria eskola nian.
Hatete Xefe Departamentu Programa Merenda Eskolar iha Ministeriu Edukasaun, Almeida Barros ba jornalista STL iha nia knaar fatin Vila Verde, Tersa nee (10/03/2026).
“Hau hanoin kona-ba implementasaun programa merenda eskolar iha munisipiu hotu programa merenda eskolar lao diak hanesan baibain, kada loron ita nian estudantes sira husi eskola idak-idak asesu ba iha programa merenda eskolar, maibe RAEOA mak seidauk lao, tanba relatoriu ba tinan 2025 nian, ita nian eskola balun seidauk kompleta, ho ida nee mak sedauk bele transfere osan ba konta eskola nian,” katak nia.
Iha fatin seluk, Diretor Rejional Edukasaun no Solidariedade Sosial (DRESS), Vincencio Cono dehan, iha Rejiaun Administrativa Espesial Oecusse-Ambeno (RAEOA) seidauk lao tanba sei iha prosesu no daudaun iha ona parte finansas.
“Kona-ba merenda eskolar, ami iha Departamentu Apoiu Asaun Sosial Eskolar Diresaun Rejional Edukasaun no Solidariedade Sosial (AASE-DRESS) Rejiaun Administrativa Espesial Oecusse-Ambeno. Iha prosesu nee, fulan kotuk ita hatama ona pedidu nee ba Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, ita iha Oecusse laos hanesan munisipiu seluk para halo tenderizasaun,” nia esplika.
Nia dehan, pedidu lao nafatin tuir manual tuan nomos adapta manual foun hodi ajusta malu ho Ministeriu Edukasaun nian, no menu merenda eskolar kontinua lao nafatin, tanba nee despaixu Prezidente Autoridade hatun tiha ona ba iha DRESS no tama ona ba parte finansas hodi bele halo kabimentasaun.
(jac)
