DILI, STLTIMORLESTE.com – Programa prioridade neebe halao iha Suku Maumeta, Postu Bazartete, Munisipiu Likisa, hahu husi tinan 2005 too ohin loron mantein konsentra ba setor infraestrutura.
Dehan Xefe Suku Maumeta, Victor da Silva ba STL iha Salaun Asosiasaun HAK Farol, Dili, Sesta (27/2/2026).
Tuir Victor hahu nia eleitu sai Xefe Suku Maumeta husi tinan 2005 too ate agora foin lalais tinan rua liu ba elitu fali, mantein programa neebe iha konsentra ba infraestrutura, tanba nee liu husi orsamentu Programa Nasional Dezenvolvimentu Suku (PNDS) iha Timor-Leste (TL) parte Suku Maumeta konsentra ba kanalisa bee-moos, halo reabilitasaun ba estrada rural, hadia sede suku inklui uma ba komunidade kbiit laek ho mos programa seluk neebe atende nesesidade komunidade Maumeta.
Nuudar autoridade suku sente orgulhu ba programa governu anterior VIII-Governu Konstitusional tanba iha tempu neeba komunidade Suku Maumeta neebe kategoria kbiit laek konsege hetan uma 12. Nee duni, durante tinan rua tutuir malu husi etapa primeiru ka tinan primeiru hetan UKL 3, tuir mai segundu hetan tan UKL 9 total uma 12. Husu total uma 12 fahe ba aldeia 4, tanba Suku Maumeta iha aldeia 4, kada aldeia ida hetan uma 3. Aleide hetan UKL, hetan mos kalen uma nian ba uma kain 50 resin.
Nuudar Xefe Suku, nia sente orgulhu tanba ho planu governu bele suporta nia povu liu-liu ba sira neebe kbiit laek alias forasa la iha halo uma bele hetan uma husi governu. “Hau sente kontente tanba nia ema sira nee mai goria ema kbiit laek duni mak hetan, benefisiariu sira balu oan barak liu maibe la iha kbiit halo uma, balu mos viuba oan barak maibe lain mate, tan nee la iha kbiit halo uma ba sira nia-aan,” katak Victor.
Victor mos dehan, tama ba governasaun Nuno Governu Konstitusional neebe lidera husi Primeiru Ministru (PM), Xanana Gusmão programa dezenvolvimentu neebe lao iha Suku Maumeta liu husi Programa Nasional Dezenvolvimentu Suku (PNDS) barak liu konsentra setor infraestrutura nee duni nafatin halo estrada ho kanalizasaun bee-mos ba komunidade sira liu husi orsamentu PNDS.
Kona-ba progresu setor saude, katak Victor, iha nia suku atendimentu saude lao diak tanba iha doutora ida, parteira ida, imprimeira ida ho farmasia ida kona-ba fahe ai-moruk. Maibe sei presiza halo fali postu foun tanba postu tuan neebe uza dadauk agora nee husi povu mak halo depois mak entrega ba governu tau hanesna postu saude.
(ger)
