BAUKAU, STLTIMORLESTE.com – Empreza Publiku Bee Timor-Leste (BTL) neebe kanaliza bee moos ba komunidade iha Baguia, Postu Administrativu Baguia, Munisipiu Baukau, agora paradu total. Informa Administrador Postu Administrativu Baguia, Mario Xavier da Silva ba STL iha Vila Nova, Tersa (29/4/2025).
“Too agora, Baguia Vila seidauk asesu bee moos, entretantu projetu bee moos iha neeba, maibe agora paradu hela,” hatete Mario Xavier da Silva.
Projetu BTL iha Baguia nee, alende kanaliza kazu bee mos, konstrui mos tanki bee no monta torneira husi bee matan Defauasi. Kanalizasaun bee mos nee ba komunidade aldea tolu iha area Suku Alaua Leten no ba komunidade Suku Alaua Kraik. Bainhira projetu nee finaliza, sei fo asesu bee mos ba komunidade sira iha neeba. Maibe seidauk atinji, servisu iha terenu abandona.
Nia lamenta projetu BTL nee abandona, tanba komunidade sira iha neeba, presiza tebes bee mos. Komunidade sira iha neeba, esperansa tebes ba projetu refere, kuandu remata bele asesu ona bee mos. Maibe nia haree implementasaun la ho fuan, laiha responsabilidade ba servisu neebe BTL implementa iha neeba.
“Ami halo ona karta ba BTL. Husu BTL para haree rasik projetu neebe implementa,” dehan nia.
STL tenta konfirma Koordenadora Bee Timor-Leste Empreza Publiku Baukau, Adriana Belo da Roza via telefone, maibe seidauk fo komentariu. Nia sei inkomoda hela ho atividade seluk.
(tom)
